टाळ-मृदंगांच्या गजरात अन् हरिनामाच्या जयघोषात आज दुपारी साडेबारा वाजता संत सोपानकाकांच्या पालखी सोहळ्याचे नीरा येथे उत्साहात आगमन झाले. यावेळी ग्रामस्थांनी भक्तिमय वातावरणात पालखीचे स्वागत केले.
श्री संत सोपानकाकांच्या पालखी सोहळ्याने मांडकी येथील मुक्काम आटोपून सकाळी सात वाजता मार्गस्थ झाला. जेऊर येथे सकाळी साडेसात वाजता सकाळच्या न्याहरीकरिता विसावला. पिंपरे खुर्द येथे सव्वाअकरा वाजण्याच्या सुमारास विश्रांतीकरिता सोहळा थांबला. दुपारी साडेबारा वाजता दुपारच्या विसाव्यासाठी नीरा नगरीत दाखल झाला. यावेळी सरपंच तेजश्री काकडे, राजेश काकडे आदींसह ग्रामपंचायतीचे कर्मचारी व ग्रामस्थांनी सोहळ्याचे उत्स्फूर्त स्वागत केले.
तरुणांनी रथातून पालखी खांद्यावर घेऊन विठ्ठल मंदिरात दर्शनासाठी ठेवली. नितीन कुलकर्णी यांच्या निवासस्थानी सोपानकाकांच्या पादुकांची विधिवत पूजा केली. यानंतर दुपारचे भोजन झाले. त्यानंतर पालखी सोहळा दुपारी तीन वाजता बारामती तालुक्यातील निंबूत येथील मुक्कामाकरिता मार्गस्थ झाला.
.jpeg)
Comment List