इटली येथील मिलान शहरात झालेल्या जगप्रसिद्ध फॅशन शोमध्ये सहभागी मॉडेलनी लाखाच्या घरात किंमत असलेल्या कोल्हापुरी चप्पला घालून रॅम्प वॉक केला. या चपलेवर एका परदेशी खासगी कंपनीचे नाव होते.पण भारतासह प्रामुख्याने कोल्हापूरचा कुठेच उल्लेख न झाल्याने सोशल मीडियावर नेटकऱयांनी चांगलाच संताप व्यक्त केला. कोल्हापुरातील कारागिरांनी या आलिशान चपलेबद्दल शंका उपस्थित केली असून जीआय मानांकन असतानाही प्राडा या आंतरराष्ट्रीय कंपनीने हुबेहूब कोल्हापुरी चप्पल जागतिक व्यासपीठावर झळकवली कशी, असा सवालही उपस्थित केला जाऊ लागला आहे.
ज्या खाजगी कंपनीने आलिशान आकारात हुबेहूब कोल्हापुरी चप्पल जगासमोर आणली, त्या कंपनीने या चपलेची किंमत एक लाख 23 हजार इतकी लावली आहे. मुळात संपूर्ण हस्तकलेचा उत्कृष्ट नमुना असलेली आणि नैसर्गिक चमडय़ापासून बनवलेली कोल्हापुरी चप्पल इतक्या महागडय़ा किमतीत आत्तापर्यंत कारागिरांकडून कधीच विकली गेली नाही. त्यामुळे मोठय़ा कंपन्यांनी केलेली ही चूक मूळ कोल्हापुरी चपलेच्या ब्रँडवर गदा येऊ शकते, अशा भावनाही कोल्हापुरातील कारागिरांकडून व्यक्त केल्या जात आहेत.
Comment List