जूनच्या मध्यातच उजनी निम्मे भरले

सोलापूरसह तीन जिह्यांची वरदायिनीअसलेले उजनी धरण यंदा मान्सूनपूर्व पावसामुळे जूनमध्येच 50 टक्क्यांहून अधिक भरले आहे. सायंकाळपर्यंत उजनीत 90 टीएमसी पाणीसाठा होता. दोन महिन्यांपूर्वी मृत साठय़ात गेलेले उजनी धरण मान्सूनपूर्व पावसामुळे जूनच्या मध्यात 50 टक्के भरल्याने पिण्याचे पाणी, शेती आणि उद्योग क्षेत्रासाठी समाधान देणारी घटना आहे.

वरदायिनी उजनीमध्ये 14 मेपर्यंत पाणीपातळी वजा 23 टक्क्यांपर्यंत आलेली असताना, 18 मे पासून भीमा खोऱयात मान्सूनपूर्व पाऊस व अवकाळी पावसाच्या दणक्याने उजनीतील पाणीपातळीत झपाटय़ाने वाढ होत आहे. भीमा व नीरा नद्या दुथडी भरून वाहत असून, बंडगार्डन आणि दौंडमधून उजनीत मोठय़ा प्रमाणावर विसर्ग सुरू असल्याने जूनच्या मध्यालाच उजनी फिफ्टी प्लसमध्ये आले आहे. सध्या उजनी धरणामध्ये येणारी आवक वाढत आहे. सोमवारी सायंकाळी पुणे बंडगार्डनमधून 14545 क्युसेक, तर दौंड येथून 11 हजार 719 क्युसेकने विसर्ग सुरू होता.

उजनीत सध्या एकूण पाणीसाठा 90 टीएमसी, तर उपयुक्त पाणीसाठा 27 टीएमसी इतका आहे. घाटमाथा व भीमा खोऱयात पाऊस वाढला असून, भीमाशंकर ते पुणे दरम्यान कोसळधारा सुरूच आहेत