मटार महाग तर घेवड्याच्या भावात घट; मागणी कमी झाल्याने दर घसरले

पावसामुळे पुणे बाजार समितीच्या गुलटेकडी मार्केटयार्डात राज्यासह परराज्यांतून फळभाज्यांची आवक साधारण होत आहे. आवक कमी झाल्यामुळे मटारचे भाव तेजीत होते, तर मागणी कमी झाल्याने घेवड्याच्या भावात गेल्या आठवड्याच्या तुलनेने दहा ते वीस टक्क्यांनी घट झाली होती. तर मागणी आणि पुरवठा यातील समतोलामुळे इतर सर्व प्रकारच्या फळभाज्यांचे भाव मागील आठवड्याच्या तुलनेने स्थिर होते.

गुलटेकडी मार्केटयार्डात रविवारी (दि. १५) राज्याच्या विविध भागांसह परराज्यांतून सुमारे ९० ते १०० ट्रक फळभाज्यांची आवक झाली. परराज्यांतून झालेल्या आवकमध्ये आंध्र प्रदेश, उत्तर प्रदेश, कर्नाटक येथून हिरवी मिरची सुमारे १८ ते २० टेम्पो, कर्नाटक येथून कोबी ३ ते ४ टेम्पो, आंध्र प्रदेश आणि तामिळनाडू येथून शेवगा ४ ते ५ टेम्पो, इंदोर येथून गाजर ५ ते ६ टेम्पो, कर्नाटक आणि हिमाचल प्रदेश येथून घेवडा ३ ते ४ टेम्पो, हिमाचल प्रदेश ३ टेम्पो मटार, कर्नाटकातून पावटा २ टेम्पो, आंध्र प्रदेश आणि तामिळनाडू येथून कैरी ३ ते ४ टेम्पो, मध्य प्रदेश येथून लसणाची सुमारे ८ ते १० टेम्पो तर इंदूर, आग्रा, स्थानिक भागातून बटाटा ४० ते ४५ टेम्पो इतकी आवक झाली होती. स्थानिक भागातून झालेल्या आवकमध्ये सातारी आले सुमारे ५५० ते ६०० गोणी, भेंडी ५ ते ६ टेम्पो, गवार ३ ते ४ टेम्पो, टोमॅटो ७ ते ८ हजार क्रेट, हिरवी मिरची ५ ते ६ टेम्पो, काकडी ७ते ८ टेम्पो, फ्लॉवर १४ ते १५ टेम्पो, कोबी ५ ते ६ टेम्पो, ढोबळी मिरची ५ ते ६ टेम्पो, गाजर ४ ते ५ टेम्पो, भुईमूग शेंग १०० गोणी, तांबडा भोपळा १० ते १२ टेम्पो, कांदा सुमारे ७० ते ७५ टेम्पो इतकी आवक झाली होती, अशी माहिती मार्केटयार्डमधील ज्येष्ठ आडतदार विलास भुजबळ यांनी दिली.

पुदिना, चवळईच्या भावात वाढ
पावसामुळे पालेभाज्यांचे प्रचंड नुकसान झाले आहे. परिणामी बाजारात पालेभाज्यांची आवक कमी प्रमाणात होत आहे. पुदिना, अंबाडी, चुका आणि चवळईच्या भावात वाढ झाली असून कोथिंबीर, शेपू, पालकच्या भावात काहीशी घट झाली होती. गुलटेकडी मार्केटयार्डातील घाऊक बाजारात रविवारी (दि. १५) कोथिंबिरीची सुमारे ९० हजार जुडी, तर मेथीची २० हजार जुडींची आवक झाली होती.

पालेभाज्यांचे शेकड्यातील भाव कोथिंबीर १००० ते २५००, मेथी : २०००-३५००, शेपू : ८००- १५००, कांदापात १५००-२०००, चाकवत: ५००-८००, करडई : ४००-६००, पुदिना: ५००-१०००, अंबाडी: ५००-८००, मुळे: १२००-१५००, राजगिरा : ४००- ७००, चुका ५००-१०००, चवळई : ५००-८००, पालक : १५००-२०००.