पुण्यात गुंड शाहरुख शेख चकमकीत ठार

पुण्यातील टिपू पठाण टोळीतील गुंड शाहरुख ऊर्फ अट्टी रहीम शेख (23) हा रविवारी पहाटे सोलापूर जिह्यातील मोहोळ तालुक्यात लांबोटी येथे पुणे पोलिसांशी झालेल्या चकमकीत ठार झाला. त्याला पकडण्यासाठी गेलेल्या पोलीस पथकावर त्याने गोळीबार केला आणि त्यानंतर चकमक उडाली. शाहरुख याच्यावर खुनाचा प्रयत्न, दरोडा, जबरी चोरी, खंडणीसारखे गंभीर स्वरूपाचे 15 गुन्हे दाखल असून, तो गेल्या काही महिन्यांपासून फरार होता.

शेख हा सराईत गुंड टिपू पठाण याच्या टोळीचा साथीदार होता. पठाणने त्याच्या साथीदारासह हडपसर येथील एका जागेवर ताबा मारून शेड ठोकले होते. त्यानंतर ती जागा पुन्हा मालकाला देण्यासाठी 20 लाख रुपयांची मागणी केली. याप्रकरणी पठाण याच्यासह सात ते आठजणांवर खंडणी आणि महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्यात आली होती. यात शाहरुख हा आरोपी होता. त्याचा शोध घेत असताना, तो राजू अहमंद शेख याच्या घरी राहत असल्याची माहिती पोलिसांना मिळाली. त्यानुसार गुन्हे शाखेचे सहायक निरीक्षक मदन कांबळे, अंमलदार विनोद शिवले, अमित कांबळे, अकबर शेख यांच्यासह पथकाने ही कारवाई केली.

खंडणी, मोक्कातील पाहिजे आरोपी असलेल्या शेख याला पकडण्यासाठी पथक सोलापूरला गेले होते. त्याला ताब्यात घेण्यासाठी गेलेल्या पथकावर त्याने प्रथम हल्ला केला. त्यानंतर स्वसंरक्षणार्थ पोलिसांनी फायर केले. शाहरुख हा मागील तीन महिन्यांपासून फरार होता. – निखिल पिंगळे,  पोलीस उपायुक्त, गुन्हे शाखा