हडपसर भागातील एका नामांकित सोसायटीतील फ्लॅटमधून 48 तोळे सोने-चांदीसह तिजोरीच चोरून पसार झालेल्या चोरट्याला गुन्हे शाखेच्या दरोडा व वाहनचोरी विरोधी पथकाने अटक केली. घरफोडीनंतर पळून जाण्यासाठी आरोपीने चोरीची आणि नंबर नसलेल्या दुचाकी वापर केला. मात्र, पथकाने सलग 23 दिवस पुण्यासह बार्शी, सोलापूर, धाराशिव, परांडा भागात तपास करून आरोपीचा माग काढला. त्याच्याकडून चोरीचा मुद्देमाल जप्त करण्यात आला आहे.
रोहित विलास अंधारे (वय 25, रा. भांडगाव, ता. परांडा, धाराशिव, सध्या. रा. खराडी) असे अटक करण्यात आलेल्याचे नाव आहे. अंधारे हा एका खासगी रुग्णालयात एक्स-रे टेक्निशियन म्हणून नोकरी करीत होता. मात्र, व्यसनाधीन आणि कर्जबाजारी झाल्याने त्याने हे पाऊल उचलल्याचे प्राथमिक तपासात समोर आले आहे. 18 मे रोजी हडपसर परिसरातील एका फ्लॅ टमधून ४८ तोळे सोन्या-चांदीचे दागिने चोरून नेल्याची घटना घडली होती. याबाबत हडपसर आणि गुन्हे शाखेच्या पथकाकडून तपास सुरू होता.
यादरम्यान पोलिसांना नंबर नसलेली संशयित दुचाकी मिळाली. याच दुचाकीचा वापर करून आरोपीने घरफोडी केल्याचे सीसीटीव्हीतून समजले. त्यानुसार पोलिसांनी तांत्रिक तपास सुरू केला. जवळपास 170 सीसीटीव्ही कॅमेऱ्यांची तपासणी केली. तसेच धाराशिव, भूम, सोलापूरसह विविध भागात शोधमोहीम राबविली. गुन्हे शाखेच्या पथकाने सलग 23 दिवस तांत्रिक विश्लेषण, सीसीटीव्ही फुटेज आणि इतर माहितीच्या आधारे तपास करून आरोपीला मांजरी भागातून ताब्यात घेतले. त्याच्याकडून 48 तोळे सोने, डायमंडचे दागिने, चांदी आणि दुचाकी जप्त केली. गुन्हे शाखेचे अपर पोलीस आयुक्त पंकज देशमुख, उपायुक्त निखिल पिंगळे, सहायक आयुक्त राजेंद्र मुळीक यांच्या मार्गदर्शनाखाली पोलीस निरीक्षक नंदकुमार बिडवई, संदीपान पवार, सहायक निरीक्षक प्रवीण काळुखे, सी. बी. बेरड, अंमलदार बाळू गायकवाड, प्रदीप राठोड, धनंजय ताजणे, अजित शिंदे, अमोल सरतापे, विनायक येवले, मनोज खरपुडे, जहांगीर पठाण, श्रीकांत दगडे आदींसह पथकाने ही कारवाई केली.
.jpeg)
Comment List