श्री विठ्ठल-रुक्मिणीमातेच्या दर्शनासाठी येणाऱ्या भाविकांना सुलभ व जलद दर्शन मिळावे म्हणून मंदिर समितीच्या वतीने टोकन दर्शन प्रणालीची 15 जूनपासून प्रथम चाचणी घेण्यात येणार आहे. त्या अनुषंगाने प्रथम चाचणी दिवशी सुमारे 1200 टोकन उपलब्ध होणार आहेत. भाविकांनी टोकन दर्शनाचे बुकिंग मंदिर समितीच्या अधिकृत संकेतस्थळावरून करावे, अशी माहिती मंदिर समितीचे सहअध्यक्ष गहिनीनाथ महाराज औसेकर यांनी दिली.
तिरूपती बालाजी येथे भाविकांना दर्शनासाठी टोकन पद्धतीचा वापर करण्यात येत आहे. पंढरपूर विठ्ठल मंदिराच्या इतिहासात पहिल्यांदाच टोकन दर्शन पद्धतीचा वापर करण्यात येणार आहे.
श्री विठ्ठल-रुक्मिणीमातेच्या दर्शनासाठी येणाऱ्या भाविकांना सुलभ व जलद दर्शन देण्यासाठी टाटा कन्सल्टन्सी सर्व्हिसेस, बंगळुरू यांच्याकडून सेवाभावी तत्त्वावर टोकन दर्शन प्रणाली विकसित करून घेण्यात आली आहे. दरवर्षी वारकरी भाविकांची वाढती संख्या पाहता, भविष्यात दर्शनरांग आणि भाविकांच्या सोयींच्या योग्य व्यवस्थापनावर काम करणे अत्यावश्यक आहे. या प्रणालीद्वारे भाविकांना आधीच दर्शनाची वेळ निश्चित करून दर्शनासाठी रांगेत न थांबता, ठराविक वेळेत दर्शन हॉलच्या माध्यमातून मंदिरात प्रवेश करता येणार आहे. ही प्रणाली विशेषतः गर्दीच्या काळात गर्दीचे व्यवस्थापन, भाविकांचा वेळ व श्रम वाचण्यास मदत होण्यास प्रभावी ठरणार आहे.
टोकन दर्शन प्रणालीच्या प्रथम चाचणीचे टोकन www.vitthalrukminimandir.org या संकेतस्थळावरून बुकिंग करता येणार आहे. ऑनलाइन पद्धतीने तयार झालेले टोकन प्रिंट करून निश्चित करून दिलेल्या वेळी श्री संत ज्ञानेश्वर दर्शन मंडप, पंढरपूरच्या उत्तरेकडील मागीस बाजूस प्रवेश करून टोकनची पडताळणी करून घेतली जाणार आहे. त्यानंतर दर्शन हॉलमध्ये प्रवेश दिला जाणार आहे. वेळेनुसार थेट दर्शन रांगेत प्रवेश होऊन भाविकांचे सुलभ दर्शन होणार असल्याचे कार्यकारी अधिकारी राजेंद्र शेळके यांनी सांगितले.
टोकन दर्शन प्रणालीची प्रथम चाचणी घेण्यासाठी आवश्यक ती पूर्वतयारी अंतिम टप्प्यात आली आहे. त्यासाठी श्री संत ज्ञानेश्वर दर्शनमंडप येथील दुरुस्त्या व तिसऱ्या माळ्यावर प्रतीक्षा हॉल तयार केले आहेत. तेथे बैठक व्यवस्था, प्रसाधन गृह, पिण्याचे पाणी, चहा, सुरक्षारक्षक, दिशादर्शक व आपत्कालीन मार्ग फलक, सीसीटीव्ही कॅमेरे आदी व्यवस्था करण्यात आली आहे.
प्रथम चाचणीचा शुभारंभ मंदिर समितीचे सहअध्यक्ष गहिनीनाथ महाराज औसेकर यांच्या हस्ते व सर्व सदस्य महोदयांच्या उपस्थितीत श्री संत ज्ञानेश्वर दर्शनमंडप येथे उद्या (दि. 15) सकाळी 10 वाजता होणार असल्याचे या वेळी व्यवस्थापक मनोज श्रोत्री यांनी सांगितले.
.jpeg)
Comment List