कोल्हापूर रस्त्यावरील माय ह्युंदाई शोरूमध्ये घुसून पाच चोरटय़ांनी दहा लाखांची चोरी केली. शोरूममधील तगडय़ा सुरक्षा यंत्रणेला आव्हान देत चोरटय़ांनी भिंतीवरून आत प्रवेश केला. कटर, क्रू ड्रायव्हरने उचकटून तिजोरीच पळवून नेली. मध्यरात्री दोन वाजून 59 मिनिटांनी ही चोरी झाली. या वेळी चोरटय़ांनी सुरक्षा रक्षकांवर दगडफेक केली.
घटनेची माहिती मिळताच पोलीस तत्काळ घटनास्थळी पोहोचले. तोपर्यंत चोरटय़ांनी तिजोरी कटरने कापून रक्कम घेऊन पलायन केले. परिसरातील सीसीटीव्हीत पाच चोरटे कैद झाले असून, शोधासाठी पथके रवाना करण्यात आली आहेत. शोरूमधील कर्मचारी संतोष रधुनाथ कोळी (वय 37, रा. पद्माळे, ता. मिरज) यांनी फिर्याद दिली. त्यानुसार गुन्हा नोंद करण्यात आला आहे.
कोल्हापूर रस्त्यावर अंकली हद्दीत माय ह्युंदाईचे शोरूम आहे. शहरात येणारा हा प्रमुख रस्ता असल्याने चोवीस तास वर्दळ असते. बुधवारी नेहमीप्रमाणे शोरूम बंद करण्यात आले होते. मध्यरात्री दोनच्या सुमारास चोरटय़ांनी शोरूमच्या मागील बाजूने प्रवेश केला. शोरूमच्या भिंतीवर चढून पहिल्या मजल्यावरील खिडकीतून चोरटय़ांनी आत प्रवेश केला. त्यानंतर मुख्य दरवाजा उघडल्यानंतर आणखी दोघे चोरटे आत आले. जिन्याखाली असणाऱया कॅशियर कक्षाजवळ चोरटे आले. तेथील मुख्य दरवाजा न उचकटता काच अलगदपणे काढली. कॅश काउंटरवरून कक्षात प्रवेश करत तेथील गोदरेज कंपनीची तिजोरी तिघांनी उचलून बाहेर आणली. त्यावेळी सुरक्षारक्षकांना शंका आली. त्यांनी तपासणी करण्यास सुरुवात केल्यानंतर एका चोरटय़ाने सुरक्षारक्षकांवर दगडफेक केली. मागील बाजूस शेतात चोरटे तिजोरी घेऊन गेले. तेथेच कटरने तिजोरी कापून 9 हजार 532 रुपयांची सोन्याची नथ, नऊ लाख 59 हजार 451 रुपयांची रोकड असा दहा लाखांचा ऐवज घेऊन चोरटय़ांनी पोबारा केला. पोलीस उपअधीक्षक प्रणील गिल्डा, ग्रामीणचे निरीक्षक किरण चौगले, गुन्हे अन्वेषणचे निरीक्षक सतीश शिंदे यांच्यासह पथकाने घटनास्थळी भेट दिली.
Comment List