रंकाळा स्टॅण्ड परिसरातील आयरेकर गल्लीत प्रदीप बुलबुले आणि त्यांची पत्नी माधुरी बुलबुले यांनी घरात बेकायदेशीररीत्या पाळलेली 35 हून अधिक पाळीव मांजरे महापालिकेच्या आरोग्य विभागाकडून जप्त करण्यात आली. यावेळी घरातील दुर्गंधीयुक्त कचरा व अडगळ असा दोन ट्रक्टर भरून कचराही काढण्यात आला.
दरम्यान, या कारवाईवेळी तीन मांजरे पकडण्यात आली असून, उर्वरित पाळीव मांजरे पळून गेली. महापालिकेच्या एका कर्मचाऱ्यास मांजर चावल्याने संबंधित कर्मचाऱयास उपचारासाठी रुग्णालयात दाखल करण्यात आले.
या दाम्पत्याने घरात यापूर्वी 35 पेक्षा जास्त मांजरे पाळली होती. यामुळे घरात दुर्गंधीयुक्त कचरा व अडगळ करून ठेवल्याची तक्रार स्थानिक नागरिकांकडून महापालिकेकडे करण्यात आली होती. तसेच स्थानिक नागरिकांनी याबाबत पोलीस स्टेशनमध्ये तक्रारदेखील दिलेली आहे.
महापालिका आरोग्य विभागाने आयरेकर गल्लीतील बुलबुले यांच्या घरी जाऊन बेकायदेशीर पाळीव मांजरे जप्त करून घरातील दुर्गंधीयुक्त कचरा व अडगळ असा 2 ट्रक्टर भरून कचरा काढला. घरामध्ये कचरा व घाण असल्याने संपूर्ण गल्लीत दुर्गंधी पसरली होती. अतिरिक्त आयुक्त राहुल रोकडे, सहायक आयुक्त कृष्णा पाटील व पशुवैद्यकीय अधिकारी डॉ. विजय पाटील यांच्या मार्गदर्शनाखाली आरोग्य निरीक्षक स्वप्नील उलपे, नंदकुमार पाटील, सहायक आरोग्य निरीक्षक दिलीप पाटणकर, सूरज घुणकीकर, मुकादम व कामगारांनी ही कारवाई केली.
शहरामध्ये उघडय़ावर पडलेले 257 टायर जप्त
महापालिकेच्या आरोग्य विभागाच्या वतीने डेंग्यू प्रतिबंध उपाययोजनेअंतर्गत शहरात वापरात नसलेले टायर जप्त करण्याची मोहीम राबविण्यात येत आहे. या मोहिमेअंतर्गत आज शहरामधून चारही विभागीय कार्यालयाअंतर्गत उघडय़ावर पडलेले 257 टायर जप्त करण्यात आले.
Comment List