मुख्यमंत्री माझी लाडकी बहीण योजना राबवण्यात आमची चूक झाली असे जाहीरपणे सांगणारे उपमुख्यमंत्री अजित पवार यांनी आज चक्क पलटी मारली. मध्य प्रदेशात शिवराज सिंह चौहान यांनी सुरू केलेल्या ‘लाडली बहन’ योजनेने आम्हाला प्रेरणा दिली आणि त्याच वाटेवरून आम्ही महाराष्ट्रात ‘मुख्यमंत्री लाडकी बहीण योजना राबवली. यामुळे 236 आमचे उमेदवार विजयी झाले, असे थेट सांगून टाकले.
कृषी महाविद्यालयातील पहिल्या अँग्री हॅकेथॉन स्पर्धेच्या समारोपप्रसंगी केंद्रीय कृषिमंत्री शिवराजसिंह चौहान, मुख्यमंत्री देवेंद्र फडणवीस यांच्या उपस्थितीत बोलताना अजित पवार यांनी ही भूमिका मांडली. पवार म्हणाले, ‘या योजनेमुळे महिलांनी भरभरून प्रेम दिले. आमच्या मतपेट्या मतांनी भरभरून वाहिल्या. परिणामी, विधानसभेच्या 288 जागांपैकी तब्बल 236 जागांवर आमचे उमेदवार विजयी झाले. हा आजपर्यंतचा सर्वात मोठा आणि ऐतिहासिक विजय आहे. राज्यात महायुतीचे एक बळकट सरकार स्थापन झाले आहे.’
शिवराजसिंह चौहान यांचे विशेष आभार मानत ते म्हणाले, तुम्ही आम्हाला मतदारांची मने जिंकण्याचा मार्ग दाखवला. आम्ही तुमच्या पावलावर पाऊल ठेवून ही योजना राबवली आणि त्यातून मतदारांचा विश्वास मिळविला. त्यामुळेच हे यश शक्य झाले.
चौहान म्हणाले, ‘हीयोजना माझी नाही, ती तुमचीच आहे. मध्य प्रदेशात लाडकी लक्ष्मीपासून लाडकी बहीणपर्यंतचा प्रवास महिला सशक्तीकरणाचा आहे. मात्र, महाराष्ट्राने केलेल्या अनेक कामांचा अवलंब अन्य राज्ये करत आहेत. दुसऱ्यांकडील एखादे काम चांगले असल्यास महाराष्ट्रात अवलंब केला जातो.’
Comment List