वैष्णवी हगवणे आत्महत्याप्रकरणी अटक आरोपी नीलेश चव्हाण याचा मोबाईल, शस्त्र, पासपोर्ट, लॅपटॉप जप्त करण्यात आला आहे. तसेच चव्हाण याच्याकडून सासू लता, नणंद करिश्मा, पती शशांक यांचे मोबाईल जप्त करण्यात आले आहेत, अशी माहिती पोलिसांनी न्यायालयात दिली. तसेच चव्हाण याने इतर आरोपींना गुन्हा करण्यासाठी चिथावणी दिल्याचे तपासात निष्पन्न झाल्याचे पोलिसांनी सांगितले.
वैष्णवी हगवणे आत्महत्याप्रकरणी अटक केलेल्या नीलेश चव्हाण आणि सासरा राजेंद्र हगवणे, दीर सुशील हगवणे यांच्या पोलीस कोठडीची मुदत संपल्याने त्यांना आज पुन्हा न्यायालयात हजर करण्यात आले होते.
वैष्णवीचे बाळ ताब्यात असताना चव्हाण याने बाळाशी गैरवर्तन केले आहे का?, चव्हाण याचा गुह्याच्या कटात सहभाग असल्याचे निष्पन्न झाले असून त्याबाबत तपास करायचा आहे. चव्हाण आणि इतर आरोपींमधील मोबाईल फोनच्या माध्यमातून नेमके काय संभाषण झाले त्याबाबत तपास करायचा आहे. त्यामुळे त्याच्या पोलीस कोठडीत वाढ करावी, अशी मागणी सरकारी वकील नितीन अडागळे यांनी केली, तर राजेंद्र आणि सुशील हगवणे यांच्या पोलीस कोठडीचे हक्क अबाधित ठेवून न्यायालयीन कोठडीची मागणी केली. न्यायालयाने दोन्ही बाजूचे म्हणणे ऐकून घेत चव्हाण याच्या पोलीस कोठडीत 7 जूनपर्यंत वाढ करण्याचा आदेश दिला, तर राजेंद्र आणि सुशील याची न्यायालयीन कोठडी सुनावली.
हगवणे मायलेकाला
तीन दिवसांची पोलीस कोठडी
वैष्णवी हगवणे मृत्यू प्रकरणातील आरोपी हगवणे मायलेकावर जेसीबी मशीनच्या व्यवहारात आर्थिक फसवणुकीचा गुन्हा दाखल झाल्यानंतर महाळुंगे एमआयडीसी पोलिसांनी न्यायालयीन कोठडीतून मंगळवारी शशांक हगवणे आणि लता हगवणे या मायलेकाला ताब्यात घेतले. राजगुरूनगर न्यायालयात त्यांना हजर केले असता दोघांनाही 6 जूनपर्यंत तीन दिवसांची पोलीस कोठडीत ठेवण्याचे आदेश न्यायालयाने दिले, अशी माहिती वरिष्ठ पोलीस निरीक्षक नितीन गीते यांनी दिली.
Comment List