राज्य महिला आयोगाच्या अध्यक्षपदी राजकीय वलय असलेल्या व्यक्तीची नियुक्ती करणे चुकीचे आहे हे आता स्पष्ट झाले आहे. गेल्या काही प्रकरणात आयोगाच्या अध्यक्षांची भूमिका पक्षपातीपणाची दिसून आली. पक्षाचा एक विभाग असल्यासारखे आयोगाचे काम कोणी चालवित असेल तर लोकांना न्याय मिळणार नाही. लोकांच्या आग्रहास्तव महिला आयोगाच्या अध्यक्षांनी स्वतःहून राजीनामा द्यायला हवा, अशी मागणी आमदार रोहित पवार यांनी पत्रकार परिषदेत व्यक्त केली.
महाराष्ट्र राज्य क्रिकेट संघटनेच्या वतीने आयोजित पत्रकार परिषदेनंतर ते बोलत होते. वैष्णवी हगवणे यांच्या आत्महत्येनंतर राज्य महिला आयोगाच्या अध्यक्षा रूपाली चाकणकर यांच्यावर चौफेर टीका झाली आहे. त्या पार्श्वभूमीवर बोलताना रोहित पवार म्हणाले, राज्य महिला आयोगाच्या अध्यक्षपदी राजकीय व्यक्तीची नियुक्ती करता कामा नये. या पदावर निवृत्त न्यायाधीश, निवृत्त पोलीस अधिकारी आदी क्षेत्रांतील व्यक्तींची नियुक्ती झाली पाहिजे. विधानसभेच्या पुढील अधिवेशनात याबाबत विषय उपस्थित करणार आहोत, असे रोहित पवार यांनी सांगितले.
आम्ही पत्र दिल्याची माहिती खोटी!
दोन्ही राष्ट्रवादी काँग्रेस एकत्र येण्यासंदर्भात चर्चा सुरू असताना मी आणि जयंत पाटील यांनी शरद पवार यांना पत्र दिल्याची माहिती खोटी आहे. आमच्या पक्षाचे अध्यक्ष शरद पवार यांनी याविषयीचा निर्णय घेण्याची जबाबदारी पक्षाच्या कार्याध्यक्षा खासदार सुप्रिया सुळे यांच्याकडे दिली आहे. सध्या त्या देशाची भूमिका मांडण्यासाठी परदेश दौऱ्यावर आहेत. 5 जूननंतर त्या मायदेशात परततील. त्यानंतरच याबाबतचा निर्णय त्या घेतील, असे रोहित पवार म्हणाले.
Comment List