मध्य रेल्वेच्या सर्वात प्रतिष्ठत व लोकप्रिय ट्रेनपैकी एक असलेल्या ‘डेक्कन क्वीन’च्या सेवेला 95 वर्षे पूर्ण झाली आहेत. येत्या 1 जूनला ही राणी तिच्या गौरवशाली 96 व्या वर्षांच्या सेवेत पदार्पण करणार आहे. 1 जून 1930 रोजी मुंबई आणि पुणे या दोन शहरांच्या सेवेत दाखल झालेली ‘डेक्कन क्वीन’ ही ट्रेन मध्य रेल्वेच्या अग्रदूत असलेल्या ग्रेट इंडियन पेनिन्सुला रेल्वेच्या इतिहासातील एक महत्त्वाचा टप्पा होता. दोन महत्त्वाच्या शहरांना सेवा देणारी ही पहिली डिलक्स ट्रेन होती. त्यावरूनच तिला ‘डेक्कन क्वीन’ असे नाव देण्यात आले.
ही ट्रेन सुरुवातीला सात डब्यांसह दोन रेकसह सेवेत दाखल करण्यात आली होती. त्यापैकी एक रेक चांदीच्या रंगात लाल मोल्डिंगसह रंगवण्यात आला होता, तर दुसरा रेक रॉयल ब्ल्यू रंगात सोनेरी रेषेने रंगवला होता. मूळ रेकच्या डब्यांचे अंडरफ्रेम्स इंग्लंडमध्ये बनवले होते, तर कोच बॉडी जीआयपी रेल्वेच्या माटुंगा कार्यशाळेमध्ये बनवण्यात आली होती. मूळ रेकचे डबे 1966 मध्ये पेरांबूर येथील इंटिग्रल कोच फॅक्टरीद्वारे निर्मित अॅण्टी-टेलिस्कोपिक स्टील बॉडी असलेल्या इंटिग्रल कोचने बदलण्यात आले. ही ट्रेन मुंबईकर आणि पुणेकरांमध्ये प्रचंड लोकप्रिय आहे. त्यामुळे तिच्या 96 व्या वर्षातील पदार्पणामुळे प्रवासीवर्गातून आनंद व्यक्त केला जात आहे.
.jpeg)
Comment List