राहुरी तालुक्यातील देवळाली प्रवरातील विश्वकर्मा चौकात सुरू असलेला वाद वाद मिटवण्यासाठी गेलेले देवळाली प्रवरा नगरपालिकेचे माजी नगराध्यक्ष सत्यजित कदम यांच्यावर खुनी हल्ला करण्यात आला. लोखंडी पाईपने डोक्यात हल्ला केल्याने ते गंभीर जखमी झाले आहेत. त्यांच्यावर अहिल्यानगर येथील खासगी रुग्णालयात उपचार सुरू आहेत. दरम्यान, या घटनेमुळे देवळाली प्रवरा परिसरात खळबळ उडाली आहे.
बुधवारी रात्री विश्वकर्मा चौकात तरुणांतील दोन गटांत शाब्दिक चकमक उडाली. गल्लीतील काही समजदार मंडळींनी येऊन वाद मिटविण्यासाठी प्रयत्न केला. मात्र, त्यांच्याच अंगावर जात शिवीगाळ करण्याचा प्रकार घडला. याची माहिती समजताच, वाद मिटवण्यासाठी माजी नगराध्यक्ष सत्यजित कदम आले होते. त्यावेळी त्यांच्या डोक्यात लोखंडी पाईप मारण्यात आला. घटनास्थळावरून कदम यांना राहुरी फॅक्टरी येथील ओंकार हॉस्पिटलमध्ये उपचारासाठी दाखल करण्यात आले. यावेळी रुग्णालयाबाहेर सत्यजित कदम यांच्या समर्थकांनी मोठी गर्दी झाली होती. त्यानंतर कदम यांना पुढील उपचारासाठी नगर येथे हलविण्यात आले आहे.
माजी आमदार चंद्रशेखर कदम, सागर बेग यांसह राजकीय व सामाजिक संघटनांच्या नेत्यांनी रुग्णालयात धाव घेतली आहे. यावेळी हल्ला करणाऱ्या ‘त्या’ तरुणांना तातडीने अटक करावी, अशी मागणी यावेळी करण्यात आली.
आमच्या शेपटावर पाय दिल्यास सोडत नाही – चंद्रशेखर कदम
हल्ल्याच्या घटनेनंतर माजी आमदार चंद्रशेखर कदम यांच्यासह मोठा जनसमुदाय जमला होता. शहरात बाबूराव पाटील यात्रा सुरू असल्याने कार्यकर्त्यांनी संयम ठेवावा, असे आवाहन करीत ‘आम्ही कोणाच्या शेपटावर पाय देत नाही. आमच्या शेपटावर कोणी पाय दिल्यास सोडत नाही,’ असा स्पष्ट इशारा माजी आमदार कदम यांनी दिला. यावेळी श्रीरामपूर विभागाचे पोलीस उपअधीक्षक डॉ. बसवराज शिवपुजे, पोलीस निरीक्षक संजय ठेंगे उपस्थित होते. पोलीस उपअधीक्षक शिवपुजे यांच्यासमोर तक्रारी मांडत अनेकांनी शहरातील अवैध धंदे बंद करण्याची मागणी केली.
.jpeg)
Comment List