माळशिरस तालुक्यातील मारकडवाडी ग्रामस्थांनी ईव्हीएम मशिनवर झालेल्या मतदानावर जोरदार आक्षेप घेतला आहे. ईव्हीएममधून झालेल्या मतदानाची पोलखोल करण्यासाठी 3 डिसेंबरला बॅलेट पेपरवर मतदान घेण्याचा ठराव केला आहे. ही मतदान प्रक्रिया पार पाडण्यासाठी तहसीलदारांनी सहकार्य करावे, अशी विनंती सरपंच व्ही. जी. मारकड यांनी केली आहे.
विधानसभा निवडणुकीत माळशिरस मतदारसंघातून महाविकास आघाडीचे राष्ट्रवादी काँग्रेसचे (शरदचंद्र पवार) उमेदवार उत्तम जानकर हे 13 हजारांचे मताधिक्य घेऊन विजयी झाले. जानकर यांनी भाजपचे उमेदवार राम सातपुते यांचा पराभव केला.
जानकर यांचा कमी मतांनी झालेला विजय मारकडवाडी ग्रामस्थांना मान्य नसून, जानकर एक लाखापेक्षा अधिक मतांनी विजयी व्हायला पाहिजेत, असे गावकऱ्यांचे म्हणणे आहे.
जानकर यांचे मताधिक्य घटण्यामागे ईव्हीएमचे कटकारस्थान असल्याचा गावकऱ्यांना संशय आहे. मारकडवाडीमध्ये जानकर यांच्या बाजूने 80 टक्के मतदान झालेले असताना ईव्हीएममधून वेगळीच आकडेवारी समोर येत आहे. निवडणुकीत राम सातपुते यांना 843 मते, तर जानकर यांना 1003 मते मिळाली आहेत. या मतदानावर गावकऱ्यांना संशय आहे. त्यामुळे पुन्हा बॅलेट पेपरवर मतदान प्रक्रिया राबवून ईव्हीएमची पोलखोल करण्याचा निर्णय गावकऱ्यांनी घेतला आहे. सातपुते यांना मिळालेल्या 843 मतांवर संशय असून, त्यांना गावातून फारतर शे-दीडशे मते मिळायला पाहिजे होती, असे गावकऱ्यांचे म्हणणे आहे.
मतदानाचे गावात लागले फलक
बॅलेट पेपरवरील मतदानासाठी गावात फलक लावून मतदानाप्रमाणे सर्व प्रक्रिया घेतली जाणार आहे. यासाठी लागणाऱ्या मतपत्रिका छापण्यास दिल्या असून, गावातील प्रत्येकाने आपण या निवडणुकीत ज्याला मतदान केले, त्यालाच मतदान करण्याचे आवाहन केले जाणार आहे. राज्यातील बहुतांश नेते ‘ईव्हीएम’वर शंका उपस्थित करू लागल्याने मारकडवाडी हे राज्यातील पहिले गाव असून, ज्या गावाने थेट बॅलेट पेपरवर मतदान घेऊन ‘दूध का दूध, पाणी का पाणी’ करण्याचे पाऊल उचलले आहे.
.jpeg)
Comment List