मुलासमोरच आईची डोक्यात हातोडी घालून हत्या

‘लिव्ह इन’मध्ये राहणाऱ्या प्रेयसीच्या चारित्र्यावर संशय आणि पैशांच्या तगाद्यामुळे प्रियकराने तीन वर्षांच्या मुलासमोरच तिच्या डोक्यात हातोडी घालून खून केला. डोळ्यांसमोरच आईची हत्या होत असताना मुलाने एकच टाहो फोडला. पुरावा नष्ट करण्यासाठी मृतदेह साताऱ्यातील खंबाटकी घाटात फेकून दिला. त्यानंतर स्वतः पोलिसांत धाव घेत प्रेयसी बेपत्ता असल्याची तक्रार दिली. तसेच तीन वर्षांच्या मुलाला आळंदी यात्रेत सोडून दिले. हा प्रकार वाकड येथे उघडकीस आला.

जयश्री विनय मोरे (वय 27, रा. मारुंजी, हिंजवडी) असे हत्या झालेल्या प्रेयसीचे नाव आहे, तर दिनेश पोपट ठोंबरे (वय 32, रा. करुंज, मावळ) याला वाकड पोलिसांनी अटक केली आहे.

जयश्री आणि दिनेश मागील चार वर्षांपासून विवाह न करता ‘लिव्ह इन रिलेशनशिप’मध्ये मारुंजीत राहत होते. त्यांना तीन वर्षांचा एक मुलगा आहे. जयश्रीचेही पहिले लग्न झाले असून, ती पतीपासून विभक्त राहत होती. दिनेशचे पहिले लग्नही झाले आहे. पहिल्या पत्नीपासून त्याला दोन मुले आहेत.

दिनेश हा चहाची टपरी आणि हिंजवडीतील एका खासगी कंपनीत एसी दुरुस्तीचे काम करीत होता. जयश्री गृहिणी होती. दिनेश जयश्रीच्या चारित्र्यावर संशय घेत होता. पैशांवरूनही त्यांच्यात वाद होत होते. यावरून 24 नोव्हेंबर रोजी रात्री 10 च्या सुमारास भूमकर चौकात दोघांमध्ये कडाक्याचे भांडण झाले. यावेळी त्यांच्यासोबत तीन वर्षांचा मुलगा आणि दिनेशची पत्नीही होती. दिनेशने मोटारीतील हातोडी जयश्रीच्या डोक्यात मारली. त्यात तिचा मृत्यू झाल्याने मुलाने एकच टाहो फोडला.

पुरावा नष्ट करण्यासाठी मृतदेह साताऱ्यातील खंबाटकी घाटात फेकून दिला. मुलाला आळंदी यात्रेत पोलिसांजवळ सोडून दिले. मंगळवारी वाकड पोलीस ठाण्यात जात जयश्री बेपत्ता असल्याची तक्रार दिली. पोलिसांना तपासादरम्यान दिनेशवर संशय आला. त्याला ताब्यात घेऊन त्यांच्याकडे चौकशी केल्यानंतर त्याने गुन्हा कबूल केल्याची माहिती उपायुक्त विशाल गायकवाड यांनी दिली. पोलिसांनी तीन वर्षांच्या मुलाला जयश्रीच्या आई-वडिलांकडे सोपविले.