चिंचवडमधील तिरंगी लढतीत कोणाला धक्का ?

राज्यातील दुसऱ्या क्रमाकांचा मतदार संख्या असलेल्या चिंचवड विधानसभा मतदारसंघात तिरंगी लढतीने चुरस निर्माण झाली आहे. तब्बल 3 लाख 87 हजार 520 मतदारांनी मतदानाचा हक्क बजावला आहे. 2019 च्या तुलनेत तब्बल 1 लाख 9 हजार 770 अधिक मतदान झाले आहे. वाढलेल्या मतदानामुळे महाविकास आघाडीचे राहुल कलाटे की भाजपचे शंकर जगताप यांना धक्का बसणार? हे शनिवारीच स्पष्ट होईल.

चिंचवड मतदारसंघात राष्ट्रवादी काँग्रेस शरदचंद्र पवार पक्षाचे राहुल कलाटे, भाजपचे शंकर जगताप, अपक्ष भाऊसाहेब भोईर यांच्यासह 21 उमेदवारांचे भवितव्य मतपेटीत बंद झाले आहे. मात्र, खरी लढत कलाटे जगताप आणि भोईर यांच्यात झाली आहे. चिंचवड मतदारसंघात 3 लाख 48 हजार 450 पुरुष, 3 लाख 15 हजार 115 महिला, 57 इतर असे 6 लाख 63 हजार 622 मतदार आहेत. यापैकी 2 लाख 3 हजार 781 पुरुष, 1 लाख 83 हजार 724 महिला, 15 इतर अशा 3 लाख 87 हजार 520 (58.39%) मतदारांनी मतदान केले.

2019च्या तुलनेत यंदा तब्बल 1 लाख 9 हजार 770 अधिक मतदान झाले. चिंचवड मतदारसंघात वाकड, पुनावळे, काळेवाडी, थेरगाव, रावेत या भागातून राष्ट्रवादीचे राहुल कलाटे यांना अधिक मतदान होण्याचा अंदाज आहे. भाजपचे शंकर जगताप यांना सांगवी, नवी सांगवी, पिंपळे सौदागर, पिंपळे निलख, वाकडचा काही भाग, चिंचवडगावातील मतांवर त्यांची भिस्त आहे, तर अपक्ष म्हणून लढत असलेले भाऊसाहेब भोईर यांचा चिंचवड, बिजलीनगर हा बालेकिल्ला आहे.

दोन-सव्वा दोन लाख मतदान घेणारा उमेदवार विजयी होणार

चिंचवड मतदारसंघात तब्बल 3 लाख 87 हजार 520 मतदारांनी आपला हक्क बजावला आहे. यामध्ये 2019च्या तुलनेत तब्बल 1 लाख 9 हजार 770 अधिक मतदान झाले आहे. त्यामुळे दोन ते सव्वा दोन लाख मते घेणारा उमेदवार विजयश्री खेचून आणेल, असा अंदाज राजकीय वर्तुळात व्यक्त केला जात आहे.