निवडणुकीसाठी 4512 मतदान यंत्रांची सरमिसळ

अहिल्यानगर जिल्ह्यातील 12 विधानसभा मतदारसंघांच्या निवडणुकीसाठी जिल्हाधिकारी तथा जिल्हा निवडणूक अधिकारी सिद्धाराम सालीमठ यांच्या उपस्थितीत जिह्यातील प्रथमस्तरीय तपासणी झालेल्या 3 हजार 763 मतदान केंद्रांसाठी द्यावयाच्या 4512 मतदान यंत्रांची पहिली जिल्हास्तरीय सरमिसळ (रॅण्डमायझेशन) प्रक्रिया करण्यात आली.

जिल्हाधिकारी कार्यालयात झालेल्या या सरमिसळ प्रक्रियेवेळी उप जिल्हा निवडणूक अधिकारी राहुल पाटील, ईव्हीएम समन्वयक शारदा जाधव, जिल्हा सूचना विज्ञान अधिकारी गजानन नकासकर आणि विविध राजकीय पक्षांचे प्रतिनिधी उपस्थित होते.

अहिल्यानगर जिह्यातील 12 विधानसभा मतदारसंघांच्या आवश्यकतेनुसार 4 हजार 512 बॅलेट युनिट, 4 हजार 512 कंट्रोल युनिट आणि 4 हजार 887 व्हीव्हीपॅट यंत्रांची पहिली सरमिसळ (रॅण्डमायझेशन) संगणकीय प्रणालीच्या माध्यमातून करण्यात आली. तत्पूर्वी राजकीय पक्षांच्या प्रतिनिधींना जिल्हाधिकारी सालीमठ यांनी सरमिसळ प्रक्रियेची माहिती दिली. सर्व मतदान यंत्रांची राजकीय पक्षांच्या उपस्थितीत प्रथमस्तरीय तपासणी पूर्ण करण्यात आली असून, ते सुस्थितीत आहेत. सर्व विधानसभा मतदारसंघांत मतदान केंद्राच्या 120 टक्के बॅलेट आणि कंट्रोल युनिट, तर 130 टक्के व्हीव्हीपॅट यंत्र देण्यात येणार आहेत. वितरणानंतर ही यंत्रे संबंधित विधानसभा मतदारसंघाच्या स्ट्राँग रूममध्ये सुरक्षा बंदोबस्तात ठेवण्यात येणार आहेत. त्या-त्या विधानसभा मतदारसंघातदेखील मतदान केंद्रनिहाय मतदान यंत्रांची सरमिसळ प्रक्रिया करण्यात येणार आहे, असे जिल्हाधिकारी सालीमठ यांनी सांगितले.