एसटीच्या ई-बसमुळे प्रवाशांना बसतोय भुर्दंड, सातारा-पुणे मार्गावरील प्रवाशांमध्ये संताप

सर्काधिक उत्पन्न देणाऱ्या सातारा-स्वारगेट (विनाथांबा) मार्गावर नव्याने उपलब्ध झालेल्या ई-बस सोडल्या जात आहेत. या बसने पुण्याला जाणाऱ्या प्रवाशांकडून 245 रुपये तिकीटदर आकारला जात असून, साध्या बसला 155 रुपये आहे. या मार्गालर सर्वाधिक ई-बस धावत असल्याने प्रवाशांना साध्या बसच्या तुलनेत नाहक 90 रुपयांचा अधिकचा भुर्दंड बसत आहे. नवीन बांधणीच्या साध्या बस उपलब्ध असूनही त्या सातारा-स्वारगेट मार्गावर सोडल्या जात नसल्याने प्रवाशांच्या खिशाला चाट बसत आहे.

सातारा शहरातून पुण्याला जाण्यासाठी नोकरदारवर्ग, विद्यार्थी व अन्य प्रवाशांची बसस्थानकावर मोठी गर्दी असते. प्रवाशांच्या सेवेसाठी एसटी महामंडळाने सातारा-स्वारगेट या मार्गावर नव्याने बारा मीटरच्या बस दिल्या आहेत. सुरुवातीच्या टप्प्यात या मार्गावर साध्या बस मार्गस्थ केल्या जात होत्या. मात्र, महिनाभरापूर्वी ई-बस उपलब्ध झाल्याने त्या सातारा-स्वारगेट मार्गावर सोडल्या जात आहेत. त्यामुळे साध्या बसचे प्रमाण कमी आहे. ई-बसचे तिकीट हे साध्या बसपेक्षा 90 रुपये महाग असल्याने प्रवाशांना आर्थिक भुर्दंड सहन करावा लागत आहे. त्यामुळे या मार्गावर साध्या बस सोडण्याची मागणी प्रवासी वर्गातून होत आहे. दरम्यान, ई-बसमध्ये अनेक त्रुटी असून, तिकीटदरही अधिक आहे. त्यामुळे प्रवाशांच्या सेवेसाठी नवीन साधी बस उपलब्ध करावी, असे सातारा-स्वारगेट प्रवासी संघटना अध्यक्ष श्रीकांत गायकवाड यांनी सांगितले.

700 प्रवाशांची नियमित ये-जा

n सातारा-स्वारगेट मार्गावरून एसटी महामंडळाला सर्काधिक उत्पन्न देणारा मार्ग म्हणून ओळखला जातो. या मार्गावर दररोज ई-बसच्या तेरा ते चौदा फेऱ्या व साध्या एसटी बसच्या सहा ते सात फेऱ्या होतात. तसेच दररोज सुमारे सातशे प्रवासी सातारा-स्वारगेट मार्गावर प्रवास करतात. तिकीट खिडकीवर कायमच प्रवाशांची भली मोठी रांग लागलेली असते. त्यामुळे एसटीच्या तिजोरीत जादा महसूल देणाऱ्या प्रवाशांच्या मागणीचा विचारदेखील करणे आकश्यक आहे.