पंढरपूर शहर व उपनगरीय भागातील अनधिकृत होर्डिंग्जवर पंढरपूर नगरपालिकेने धडक मोहीम राबवित कारवाई सुरू केली आहे. आज शहरातील पाच मोठे अनधिकृत होर्डिंग्ज जेसीबीच्या साहाय्याने उतरविण्यात आले, तर 55 होर्डिंग्जवाल्यांना होर्डिंग्जचे स्ट्रक्चरल ऑडिट त्वरित करून सात दिवसांत अहवाल सादर करण्याचा इशारा मुख्याधिकारी डॉ. प्रशांत जाधव यांनी दिला आहे.
मुंबई घाटकोपर येथे झालेल्या होर्डिंग्जच्या दुर्घटनेनंतर जिल्हाधिकारी कुमार आशीर्वाद यांनी तातडीने आपत्कालीन व्यवस्थापनाबाबत बैठक आयोजित केली होती. या बैठकीमध्ये ज्या ज्या शहरांमध्ये अनधिकृत होर्डिंग्ज असतील, त्यांच्यावर कारवाई करण्याबाबत सूचना दिल्या होत्या.
त्यानुसार पंढरपूर नगरपालिकेचे प्रशासक तथा उपविभागीय अधिकारी सचिन इथापे, मुख्याधिकारी डॉ. प्रशांत जाधव यांच्या मार्गदर्शनाखाली, उपमुख्याधिकारी सुनील वाळुंजकर, नगर अभियंता नेताजी पवार, नगर रचना सहायक सुहास झिंगे, सोमेश धट, चिदानंद सर्वगोड, नवनाथ पवार यांच्यासह अतिक्रमण विभागाच्या टीमने शहरातील सर्व होर्डिंग्जचा सर्व्हे करून 5 अनधिकृत होर्डिंग्ज रात्री उशिरापर्यंत काढून टाकले.
तसेच रेल्वे हद्दीमध्ये व शहरांमध्ये उपेंद्र पब्लिसिटी आणि बाबा पेस्टिंग यांनी 55 होर्डिंग्ज लावले आहेत. त्यांना नोटीस बजावण्यात आल्या आहेत. लावलेल्या होर्डिंग्जचे स्ट्रक्चरल ऑडिट त्वरित करून सात दिवसांत अहवाल सादर करावा. तसे न केल्यास व काही दुर्घटना घडल्यास ते जबाबदार राहतील, अशा नोटिसा बजावण्यात आलेल्या आहेत.
मुंबई घटनेच्या पार्श्वभूमीवर जिल्हाधिकाऱयांनी दिलेल्या आदेशानंतर पंढरपूर शहरातील अनधिकृत होर्डिग्ज हटविण्यासाठी धडक मोहीम सुरू केली आहे. संबंधित होर्डिंग्ज, एजन्सी यांनी त्वरित माहिती द्यावी किंवा होर्डिंग्ज काढून घ्यावेत; अन्यथा त्यांच्यावर कारवाई करणार आहोत.
– डॉ. प्रशांत जाधव, मुख्याधिकारी, पंढरपूर नगरपालिका
.jpeg)
Comment List