आंबेगाव तालुका आणि बिबट्या हे जणू एक समीकरणच बनले आहे. मागील काही वर्षांपासून या परिसरात बिबट्याची संख्या मोठ्या प्रमाणावर वाढत आहे. आता बिबटे नागरी वस्तीतही घुसत असल्याने नागरिकांमध्ये दहशतीचे वातावारण आहे. खडकी येथील शेतकऱ्याच्या उसाच्या बाऱ्यामध्ये पाण्यात बसलेल्या बिबट्याला अखेर वनविभागाने गुंगीच्या औषधाचा मारा करत जेरबंद केले आहे. तो बिबट्या आजारी असल्याने त्याला उपचारासाठी माणिकडोह येथील बिबट्या निवारण केंद्रात पाठवण्यात आले आहे.
आंबेगाव तालुक्यातील खडकी येथील माऊली नगर या परिसरातील नवनाथ शिवाजी वाबळे यांच्या घराजवळ सकाळी पहाटे बिबट्या आढळून आला. तालुक्यात सर्वत्र बिबटे नेहमीच फिरतात. त्यामुळे त्याकडे दुर्लक्ष करण्यात आले. मात्र, पुन्हा 9 वाजण्याच्या सुमारास तो बिबट्या वाबळे यांच्या घराजवळ फिरताना आढळला. दुपारी 12 वाजण्याच्या सुमारास वाबळे यांच्या घराशेजारी असणाऱ्या त्यांच्या उसाच्या शेतात पाण्याच्या बाऱ्यामध्ये हा बिबट्या पुन्हा आढळला. तसेच घराबाहेर असलेल्या जाळीच्या कुंपणाला धडक मारू लागला. त्यामुळे त्यांनी तात्काळ वनपाल शशिकांत मडके यांच्याशी संपर्क साधत या घटनेची माहिती दिली.
घटनेची माहिती मिळताच वनपरिक्षेत्र अधिकारी स्मिता राजहंस यांनी माणिकडोह येथील बिबट्या निवारण केंद्र यांच्याशी संपर्क साधून सहाय्यता मागितली. माणिकडोह येथील प्रशिक्षित पथक येताच वनपाल शशिकांत मडके, वनरक्षक संपत तांदळे, वनरक्षक प्रदीप आवटी, ऋषिकेश कोकणे, रेस्क्यू सदस्य डॉ.अतुल साबळे, वनमजूर जालिंदर थोरात यांनी बिबट्याची पाहणी करून बिबट्याला गुंगीचे औषध मारण्याची परवानगी वरिष्ठांकडे मागितली. त्यांच्याशी चर्चा करून बिबट्याला गुंगीचा डॉट मारण्याचा निर्णय घेण्यात आला. त्याप्रमाणे पथकाने बिबट्याला गुंगीचा डॉट मारला. बिबट्या हा आजारी असल्याने तो पाण्यात पडून राहिला होता. त्याला उष्माघाताचा त्रास झाला असावा किंवा तो आजारी असल्याने त्याला उलट्या होत होत्या. गुंगीचे औषध मारत या बिबट्याला मोठ्या शिताफीने ताब्यात घेण्यात आले. हा बिबट्या दीड ते दोन वर्षाचा नर जातीचा असल्याचे सांगण्यात आले. त्याला उपचारासाठी माणिकडोह येथे पाठवण्यात आल्याचे स्मिता राजहंस यांनी सांगितले.
.jpeg)
Comment List