अमली पदार्थांची खुलेआम विक्री, वैद्यकीय-अभियांत्रिकीचे शेकडो विद्यार्थी व्यसनाच्या मगरमिठीत; रविंद्र चव्हाण यांचा आरोप

मुंबई-पुण्यासह राज्याच्या विविध शहरांमध्ये खेड्यांमधून विद्यार्थी व्यावसायिक अभ्यासक्रमासाठी येत असतात. परंतु यातले बरेच विद्यार्थी हे व्यसनाच्या आहारी गेल्याची अनेक प्रकरण उजेडात आली आहे. अमली पदार्थांची खुलेआम विक्री होत असल्यामुळे विद्यार्थ्यांच भवितव्य धोक्यात आलं आहे. याच मुद्याला अनुसरून काँग्रेस खासदार रविंद्र चव्हाण यांनी नांदेडमधील वैद्यकीय-अभियांत्रिकी या अभ्यासक्रमांच्या प्रवेश परीक्षांच्या अभ्यासासाठी नांदेडमध्ये येणारे शेकडो विद्यार्थी व्यसनाधीन होत असल्याचे म्हटल आहे.

नांदेड जिल्ह्याचे पालकमंत्री अतुल सावे यांच्या अध्यक्षतेखाली नियोजन भवनामध्ये समितीची बैठक पार पाडली. या बैठकीमध्ये खासदार रविंद्र चव्हाण यांनी अमली पदार्थांची विक्री करणाऱ्यांवर कडक कारवाईची मागणी केली आहे. ते म्हणाले की, “खासगी शिकवणीवर्ग आणि वैद्यकीय-अभियांत्रिकी या व्यावसायिक अभ्यासक्रमाच्या प्रवेश परीक्षांच्या अभ्यासासाठी नांदेडमध्ये शिकणारे शेकडो विद्यार्थी व्यसनाधीन होत आहेत. शहराच्या मध्यवर्ती भागात असलेल्या दुकानांमधून वेगवेगळ्या प्रकारच्या अमली पदार्थांची खुलेआम विक्री होत आहे. ती थांबवण्यात यावी व त्या विक्रेत्यांवर कडक कारवाई करण्यात यावी.” अशी मागणी रविंद्र चव्हाण यांनी जिल्हा नियोजन समितीच्या बैठकीत केली.