राणा दाम्पत्य फडणवीसांच्या भेटीला, दुसरीकडे अमरावतीत राजकीय घडामोडींना वेग

Navneet Rana meet Fadnavis : खासदार नवनीत राणा आणि आमदार रवी राणा यांनी महाराष्ट्राचे उपमुख्यमंत्री देवेंद्र फडणवीस यांची आज भेट घेतली. यावेळी जवळपास 1 तास चर्चा झाली. 4 एप्रिल रोजी अमरावतीच्या खासदार नवनीत राणा या आपला उमेदवारी अर्ज भरण्यासाठी जाणार आहेत. यावेळी भाजपचे प्रदेशाध्यक्ष चंद्रशेखर बावनकुळे आणि उपमुख्यमंत्री देवेंद्र फडणवीस हे देखील उपस्थित राहणार आहेत. दुसरीकडे शिंदे गटाचे नेते अभिजीत अडसूळ मात्र निवडणूक लढवण्यावर ठाम आहेत. त्यामुळे महायुतीत बंडखोरी होण्याची शक्यता आहे.

अभिजीत अडसूळ बंडखोरीवर ठाम

अभिजीत अडसूळ म्हणाले की, भाजप पदाधिकारी, बच्चू कडू, अजित पवार गट आणि सर्वच पक्षाचा नवनीत राणा यांना विरोध आहे. विरोध असताना देखील राणा यांना उमेदवारी दिली गेली. सर्व पक्षाच्या नेत्यांचा दबाब माझ्यावर आहे. ते मला उमेदवार व्हायला लावत आहे. उद्या मी मुख्यमंत्री एकनाथ शिंदे यांना भेटणार आहे. अजूनही सुप्रीम कोर्टाचा निकाल बाकी आहे. त्यामुळे राणा यांचा उमेदवारी अर्ज कधीही बाद होऊ शकतो. मी अपक्ष निवडणूक लढवण्याची भूमिका घेतली आहे. आम्ही तक्रार करुनही उमेदवारी दिली जात असेल तर हे दुर्दैवी आहे.

मुख्यमंत्री आमचे नेते आहे.त्यांनी सांगितलं होतं की तुम्हाला सांगून निर्णय घेतला जाईल पण तसं झालं नाही. नवनीत राणा यांना जरी भाजपने उमेदवारी दिली तरी मी निवडणूक लढवणार आहे. लवकरच उमेदवारी अर्ज भरणार आहे. पाठीमागून सर्व पक्षाचे नेते माझ्या सोबत आहेत. भाजप पदाधिकारी यांच्या वर दबाव जरी आला तरी ते दाखवण्यासाठी प्रचार करतील. शेवटच्या दिवशी गेम करतील. पहिल्या दिवसापासून हा विरोध नवनीत राणा यांना आहे. विजय शिवतारे यांच्या बदल काय चालू आहे त्यात मी पडणार नाही. असं ही अडसूळ म्हणाले.

बच्चू कडू यांचा ही राणा यांना विरोध

दुसरीकडे वर्धा लोकसभा मतदारसंघातील प्रहारचे प्रमुख पदाधिकारी आमदार बच्चू कडू यांच्या भेटीला पोहोचले आहेत. आमदार बच्चू कडू यांनी वर्धा लोकसभा मतदारसंघातून निवडणूक लढवावी. अशी मागणी प्रहारच्या पदाधिकाऱ्यांची बच्चू कडू यांना केली आहे. अमरावती जिल्ह्यातील दोन मतदारसंघ वर्धा लोकसभा मतदारसंघात येत असल्याने निवडणूक लढवण्याची मागणी केली आहे.

आमदार बच्चू कडू यांनी शुक्रवारी महत्त्वाची पत्रकार परिषद बोलवली आहे. आमदार बच्चू कडू उद्या खासदार नवनीत राणा यांच्या विरोधात उमेदवाराची घोषणा करण्याची शक्यता आहे. बच्चू कडू अमरावती लोकसभा मतदारसंघातून निवडणूक लढवू शकतात.