चाकरमान्यांसाठी एक खुषखबर आहे. गणेशोत्सव जवळ आला की मुंबई ठाण्यातल्या चाकरमान्यांची पावलं आपल्या गावी कोकणाकडे वळतात. गणपतीत गावी जाणाऱ्यांसाठी सरकारने पाच हजार एसटी बसेसची सोय केली आहे. चाकरमान्यांना ऑनलाईन या बसचे तिकिटही बुक करता येणार आहे.
गणेशोत्सव 2025 ची तयारी म्हणून महाराष्ट्र राज्य मार्ग परिवहन महामंडळाने 23 ऑगस्ट ते 7 सप्टेंबरदरम्यान मुंबईहून कोकणात जाणाऱ्या भाविकांसाठी 5 हजार अतिरिक्त बससेवा सुरू करणार आहे.
या अतिरिक्त बसेससाठी आरक्षण करण्यासाठी अधिकृत वेबसाइट (npublic.msrtcors.com), बस डेपो किंवा एसटीचा मोबाईल अ‍ॅपवरून करता येईल. या विशेष बसेस मुंबई, ठाणे, पालघर आणि इतर महत्त्वाच्या केंद्रांवरून सोडण्यात येणार आहेत. गट आरक्षण 22 जुलैपासून सुरू होणार असून, त्यावर प्रवाशांना भाडे सवलती मिळणार आहेत.
यंदा देण्यात येणाऱ्या अतिरिक्त बससेवा गेल्या वर्षीच्या 4 हजार 300 बसांच्या तुलनेत अधिक आहेत. ही योजना आषाढी एकादशी यात्रेच्या यशस्वी आयोजनामुळेही प्रेरित झाली आहे. त्या वेळी एसटी महामंडळाने 5 हजार 200 अतिरिक्त बस सोडल्या होत्या आणि त्याला उत्तम प्रतिसाद मिळाला होता.
बससेवा सुरळीत चालू राहण्यासाठी कोकणातील महत्त्वाच्या रस्त्यांवर दुरुस्ती पथके तैनात करण्यात येणार आहेत. बसस्थानकांवर आणि थांब्यांवर 24 तास कर्मचारी आणि वरिष्ठ अधिकाऱ्यांचे निरीक्षण ठेवले जाणार आहे.
Comment List