‘बीजेपी आया, मुंबई अभी मारवाडी का?’ मुजोर व्यापाऱ्याला मनसेनं चोप दिल्यानंतर राजकारण तापलं

अभी बीजेपी आया है, तो अभी मराठी में नहीं तो मारवाडी में बात करने का…. हे शब्द आहेत मुंबईतल्या एका व्यापारीचे. भाजपचे आमदार मंगलप्रभात लोढांच्या मलबार हिलमध्ये घडलेल्या या घटनेनंतर संबंधित व्यक्तीला मनसेनं प्रसाद दिला. आधी मग्रृरी केल्यानंतर आपण असं बोललो त्याबद्दल माफी मागतो हे चोप मिळाल्यानंतर व्यापाऱ्याच्या ध्यानी आलं. भाजपनं महाराष्ट्र निवडणुकीत बटेंगे तो कटेंगेचा नारा देत एकजुटीचा संदेश दिला होता. मात्र त्याच मंगलप्रभात लोढांच्या मतदारसंघात एका व्यापाऱ्यानं आपल्याला मराठी आणि मारवाडीत वाटल्याची खंत महिलेनं व्यक्त केली.

ग्राहकांना मारवाडी भाषेत बोलण्यास सांगणाऱ्या दुकानदाराला मनसेने चोप दिल्याचा हा व्हिडीओ सोशल मीडियावर व्हायरल झाला होता.  गिरगावच्या खेतवाडी भागातील एका महिलेने याबाबत मनसेकडे तक्रार केली होती. महाराष्ट्रात भाजपचे सरकार आलं आहे त्यामुळे मारवाडीत बोललं पाहिजे असा दुकानदाराचा हट्ट होता.

काही दिवसांपूर्वी नाहूर रेल्वे स्थानकावर देखील अशीच एक घटना घडली होती. ज्यामध्ये मराठीत बोलल्याने एका रेल्वे कर्मचार्‍याने तिकीट देण्यास नकार दिला होता. हिंदीत बोला असं या कर्मचाऱ्याने जबरदस्ती केल्याने मराठी एकीकरण समितीने रेल्वे प्रशासनाकडे त्याची लेखी तक्रार केली होती. त्यानंतर त्याला तेथून हटण्यात आले होते.

दुसरीकडे ट्विटरवर गजाभाऊ नावाच्या एका ट्विटर हँडलवरुन फडणवीसांचे निकटवर्तीय मोहित कंबोज यांनी दिलेली धमकीही चर्चेत आली आहे. गजाभाऊ नावाचा महाराष्ट्रातला व्यक्ती अमेरिकेत बसून भाजप नेत्यांवर वैयक्तिक चिखलफेक करतो असा आरोप करत आपण कंबोज यांनी जगात तो कुठेही असेल त्याला उचलून आणू अशी धमकी दिली आहे.

दरम्यान सोशल मीडियात यावरुन 60 दिवसांच्या अल्टिमेटमची चर्चा रंगते आहे. त्या 60 दिवसात गजाभाऊला उचललं नाहीतर बाप बदलण्याची भाषा सुरु झालीये. त्यावरुन ठाकरे गटाचे भास्कर जाधव सुद्धा गुवाहाटीला शिंदेंसोबत जाणार होते. या आरोपावर जाधवांनी मोहित कंबोज यांना आरोप सिद्ध करण्याचं आव्हान दिलं होतं. ती प्रतिक्रिया सोशल मीडियात व्हायरल झाल्यावर आपण छोट्या माणसांवर बोलत नसल्याचं उत्तर मोहित कंबोज यांनी दिलं आहे.