काल बारामतीतून निशाणा आज भेट; शरद पवार-छगन भुजबळ भेटीची मोठी कारणं

राष्ट्रवादीचे नेते छगन भुजबळ हे शरद पवार यांच्या भेटीसाठी पोहोचले होते. सिल्व्हर ओक या शरद पवार यांच्या निवासस्थानी जात छगन भुजबळ यांनी शरद पवार यांची भेट घेतली. शरद पवारांच्या आजच्या नियोजित कार्यक्रमात छगन भुजबळ यांच्या भेटीचा उल्लेख नव्हता. ही भेट नियोजित नव्हती. त्यामुळे छगन भुजबळ यांना पवारांच्या भेटीसाठी वाट पाहावी लागली. त्यानंतर शरद पवार आणि छगन भुजबळ यांच्यात अर्धा तास चर्चा झाली. जवळपास दीड तास वाट पाहिल्यानंतर छगन भुजबळ आणि शरद पवार यांची भेट झाली. या भेटीत नेमकी कोणत्या मुद्द्यावर चर्चा झाली? याबाबत राजकीय वर्तुळासह सर्वसामान्य लोकांमध्येदेखील उत्सुकता आहे.

भुजबळांची नाराजी

लोकसभा निवडणुकीला छगन भुजबळ हे नाशिकमधून महायुतीचे उमेदवार असतील अशी शक्यता होती. मात्र शिवसेना शिंदे गटाकडून हेमंत गोडसे यांना उमेदवारी दिली. त्यानंतर छगन भुजबळ नाराज झाल्याची चर्चा रंगली. राज्यसभेला छगन भुजबळ यांना उमेदवारी दिली जाणार आणि त्यांना केंद्रात मंत्रिपदही दिलं जाणार असल्याची चर्चा रंगली. मात्र बारामतीतून पराभूत झालेल्या अजित पवार यांच्या पत्नी सुनेत्रा पवार यांना राज्यसभेची उमेदवारी देण्यात आली . या सगळ्यानंतर भुजबळांच्या मनात खदखद आहे. ते नाराज आहेत, अशी चर्चा आहे. या मुद्द्यावर छगन भुजबळांनी शरद पवारांशी चर्चा केली असण्याची शक्यता आहे.

आरक्षणाचा मुद्दा

ओबीसी आरक्षण आणि मराठा आरक्षणाचा मुद्दा सध्या ऐरणीवर आहे. या दोन समाजांमध्ये तेढ निर्माण झालाय. मराठा आंदोलक मनोज जरांगे पाटील विरूद्ध छगन भुजबळ असा संघर्ष सातत्याने पाहायला मिळतोय. या प्रश्नावर तोडगा काढणं आवश्यक आहे, या मुद्द्यावर छगन भुजबळ यांनी शरद पवार यांच्याशी चर्चा केलेली असू शकते.

सुप्रिया सुळे काय म्हणाल्या?

छगन भुजबळ हे भेटायला गेलेत याची मला माहिती नाही. आज त्यांनी वायबी सेंटरला वेळा दिली नव्हती. आज ते सिल्वर ओकवर असतील काय होतंय हे माहिती नाही. आम्ही जर तर वर राजकारण करत नाही. आम्ही खूप गांभीर्याने राजकारण करतो. आम्ही कोणा व्यक्तीसाठी राजकारण करत नाही लोकांसाठी आम्ही राजकारण करतो. भुजबळांची महायुतीत हेळसांड होतेय, याची शक्यता नाकारता येत नाही. राष्ट्रवादीत कोण येणार हा संघटनेतला निर्णय असेल. कोणी व्यक्ती तो निर्णय घेणार नाही, असं सुप्रिया सुळे म्हणाल्या.