मुंबईला अतिमुसळधार पावसाचा इशारा, यंत्रणांना सुसज्ज राहण्याचे आयुक्तांचे निर्देश

मुंबईला अतिमुसळधार पावसाचा इशारा  देण्यात आला आहे. त्यामुळे विद्यार्थ्यांची सुरक्षितता लक्षात घेता मुंबईतील सर्व शाळा, महाविद्यालयांना मंगळवार दिनांक 9 जुलै 2024 रोजी सुट्टी जाहीर करण्यात आली आहे. सर्व यंत्रणांना सुसज्ज राहण्याचे निर्देश महानगरपालिका आयुक्तांंनी दिले आहेत. आवश्यकता असेल तरच नागरिकांनी घराबाहेर पडावे असे आवाहन देखील प्रशासनाकडून करण्यात आले आहे.

भारतीय हवामान खात्याने, मुंबई महानगराला अति मुसळधार पावसाचा रेड अलर्ट दिला आहे. या पार्श्वभूमीवर, विद्यार्थ्यांची सुरक्षितता लक्षात घेता, महानगरपालिका आयुक्त भूषण गगराणी यांनी मुंबई महानगरातील सर्व व्यवस्थापनांच्या प्राथमिक, माध्यमिक व उच्च माध्यमिक शाळा तसेच महाविद्यालयांना उद्या सुट्टी जाहीर केली आहे.

अति मुसळधार पावसाचा इशारा लक्षात घेता, नागरिकांना सतर्क रहण्याचे आवाहन करण्यात आले आहे. आवश्यकता असेल तरच नागरिकांनी घराबाहेर पडावे. तसेच प्रशासनाच्या माध्यमातून वेळोवेळी देण्यात येणार्‍या सुचनांचे पालन करावे. आपत्कालीन परिस्थितीत नागरिकांनी घाबरून न जाता महानगरपालिकेच्या आपत्ती व्यवस्थापन कक्षाचा मदत सेवा क्रमांक १९१६ यावर संपर्क साधावा असे आवाहन करण्यात आले आहे.

भारतीय हवामान खात्याने मुंबईसाठी ‘रेड अलर्ट’ जारी केला आहे.

The India Meteorological Department (IMD) has issued a ‘Red Alert’ for Mumbai.

मुंबईकर नागरिकांनी आवश्यकता नसल्यास शक्यतो घराबाहेर पडणे टाळावे.

Mumbaikars, if not required, avoid stepping out of home.… pic.twitter.com/Q7gpqUYQM1

— माझी Mumbai, आपली BMC (@mybmc) July 8, 2024

भारतीय हवामान खात्याने मुंबईत अति मुसळधार पावसाचा इशारा दिला आहे. ही बाब लक्षात घेता, मुंबईकर नागरिकांची गैरसोय होणार नाही, यादृष्टीने महानगरपालिकेची यंत्रणा असल्याचे म्हटले आहे.

आज मुसळधार पावसामुळे मुंबईतील लोकल सेवा विस्कळीत झाली होती. अनेक ठिकाणी रुळावर पाणी साचल्याने वाहतूक विस्कळीत झाली होती. मध्य आणि हार्बर मार्गावरील वाहतूक विस्कळीत झाल्याने प्रवाशांचे मोठे हाल झाले, रात्रीपर्यंत वाहतूक ही पूर्ववत झाली असली तर ती धिम्या गतीने सुरु होती. मध्य रेल्वेची वाहतूक उशिराने सुरु होती. मुसळधार पावसामुळे मुंबईत अनेक सखल भागात पाणी साचले होते.