उद्धव ठाकरे भाजपसोबत येतील का?, महायुतीत काय चाललंय: संजय शिरसाट यांच्या विधानाने चर्चेला फोडणी

लोकसभा निवडणुकीचे निकाल लागल्यानंतर 15 दिवसात उद्धव ठाकरे हे भाजपच्या नेतृत्वातील एनडीएच्या आघाडीत येतील असा दावा अमरावतीचे आमदार रवी राणा यांनी केला होता. त्यावरून चर्चांना उधाण आलेलं असतानाच आज शिंदे गटाचे आमदार संजय शिरसाट यांनी मोठं विधान केलं आहे. उद्धव ठाकरे यांना एनडीएत घ्यायचं की नाही हे वेळ सांगेल. पण पंतप्रधान नरेंद्र मोदी यांच्यावर एवढी टोकाची टीका केल्यानंतर उद्धव ठाकरे येतील असं वाटत नाही, असं संजय शिरसाट यांनी म्हटलं आहे.

संजय शिरसाट यांनी मीडियाशी संवाद साधला. यावेळी त्यांनी उद्याच्या होऊ घातलेल्या निकालावरही भाष्य केलं. आता धाकधूक वाढू लागली आहे. पण ही धाकधूक आमची नाही, तर महाविकास आघाडीच्या उमेदवारांची आहे. आमचे उमेदवार निश्चिंत आहेत, असं संजय शिरसाट यांनी स्पष्ट केलं.

एकमेकांच्या उरावर बसतील

संजय राऊत आणि नाना पटोले यांच्यात बऱ्याच दिवसांपासून धुसफूस सुरू आहे. उद्याचा निकाल येऊ द्या, त्यानंतर पाहा काय घडेल. हे लोकं एकमेंकांच्या उरावर बसून भांडणं करतील, असा दावाही संजय शिरसाट यांनी केला.

तुम्हीही लग्नाला गेला होता

मराठवाड्यात महायुतीतच येणार आहे. तिथे आमचाच विजय निश्चित आहे. संजय राऊत यांनी आपल्या पक्षात काय सुरू आहे ते पाहावं. तुम्हीही अंबानींच्या मुलीच्या लग्नाला क्रुझवर गेला होता. तुम्ही फोटो टाकले. मग मोदींवर टीका करण्याचा तुम्हाला काय अधिकार? निवडणुक आयोगावर संशय करणं चुकीचं आहे, असं त्यांनी सांगितलं.

वरिष्ठ निर्णय घेतील

चार जणांनी पदवीधर मतदारसंघातून निवडणूक लढण्याची इच्छा व्यक्त केली आहे. त्यामुळे पदवीधर मतदारसंघाची निवडणूक फ्रेंडली होत असेल तर वरिष्ठ नेते बसून त्याबाबतचा निर्णय घेतील, असंही त्यांनी स्पष्ट केलं.

पवार मोठे नेते, तोडगा काढू

शरद पवार यांनी मुख्यमंत्री एकनाथ शिंदे यांना दुष्काळाच्या मुद्द्यावर पत्र लिहिलं आहे. त्यावरही त्यांनी भाष्य केलं. राज्यात दुष्काळ परिस्थिती गंभीर आहे, पण मुख्यमंत्री एकनाथ शिंदे यांनी यात लक्ष घालून सगळ्यांना विशेष काळजी घेण्याचं आवाहन केलंय. प्रशासनाला सूचना दिल्या आहेत. शरद पवार मोठे नेते आहेत. त्यांच्या मतांचा आम्ही आदर करतो. निश्चितच यावर तोडगा निघेल, असं त्यांनी स्पष्ट केलं.