घाटकोपरमध्ये मोठी दुर्घटना, पेट्रोल पंपावर होर्डिंग कोसळलं, 100 पेक्षा जास्त जण अडकले

मुंबई कोणतं संकट कधी कसं येऊन धडकेल याचा काहीच भरोसा नाही. मुंबईत दुपारी 3 वाजेपर्यंत ऊन आणि मोकळं आभाळ असलेलं वातावरण होतं. पण अचानक वातावरणात बदल झाला आणि वादळी वारा, मेघगर्जनेसह पावसाला सुरुवात झाली. पावसापेक्षा वारे प्रचंड वेगाने वाहू लागले. या वाऱ्याचा वेळ तासी 40 ते 50 किमी असा होता. त्यामुळे अनेक ठिकाणी नागरिकांची मोठी तारांबळ उडाली. मुंबईतील दोन ठिकाणी तर मोठमोठ्या होर्डिंग कोसळल्याची घटना घडल्या. आधी वडाळा येथील श्री जी टॉवरजवळ होर्डिंग कोसळल्याची घटना घडली. संबंधित घटना कॅमेऱ्यातही कैद झालीय. अतिशय चित्तथरारक अशी ही घटना आहे. या घटनेत कुणी जखमी झालं आहे का, कितपत नुकसान झालंय, याबाबतची सविस्तर मााहिती अद्याप समजू शकलेलं नाही. पण या घटनेनंतर घाटकोपमध्येदेखील अशाच घटनेची पुनरावृत्ती झाली. वादळी वाऱ्यामुळे घाटकोपरमध्ये भलंमोठं होर्डिंग हे पेट्रोल पंपावर कोसळलं.

घाटकोपरमध्ये होर्डिंग कोसळल्याच्या घटना खूप मोठी आहे. कारण पाऊस आणि वादळी वारा यामुळे अनेकांनी पेट्रोल पंपाच्या छताखाली जाण्याचा विचार केला. त्यामुळे अनेकजण स्वत:ला पावसाच्या पाण्यापासून वाचवण्यासाठी पेट्रोल पंपाच्या छताखाली गेले होते. तर दुसरीकडे अनेक वाहनं पेट्रोल आणि डिझेल भरण्यासाठी पेट्रोल पंपवर आल्या होत्या. या दरम्यान वादळी वाऱ्यामुळे पट्रोल पंपाच्या बाजूला लावण्यात आलेलं भलंमोठं होर्डिंग हे थेट पेट्रोल पंपावर कोसळलं. यामुळे मोठा हाहा:कार उडाला. घाटकोपरमधील छेडानगर परिसरात ही घटना घडली. घटना घडताच मोठी तारांबळ उडाली. अनेकांनी अडकलेल्या नागरिकांना वाचवण्यासाठी प्रयत्न सुरु केले. घटनेचं गांभीर्य ओळखून एनडीआरएफच्या पथकाला घटनास्थळी तातडीने पाचरण करण्यात आलं आहे.

आतापर्यंत 35 जखमी रुग्णालयात दाखल

पोलिसांना दुर्घटनेची माहिती देण्यात आली. त्यानंतर पोलीस, अग्निशमन दलाचे जवान आणि बचाव पथक घटनास्थळी दाखल झाले. प्रशासनाकडून नागरिकांना वाचवण्याचे शर्थीने प्रयत्न सुरु झाले. या पेट्रोल पंपावर जवळपास 100 पेक्षा जास्त जण अडकल्याची माहिती मिळत आहे. बचाव पथकाने आतापर्यंत अनेक जणांना रेस्क्यू करुन बाहेर काढलं आहे. जखमींना तातडीने एसएमटी भारती, एमएस, आणि राजावाडी रुग्णालयात दाखल करण्यात येत आहे. मिळालेल्या माहितीनुसार, आतापर्यंत 35 जखमींना रुग्णालयात उपचारासाठी दाखल करण्यात आलं आहे. सर्वांची प्रकृती स्थिर असल्याची माहिती मिळत आहे.