आता अजितदादांच्या मुलाचीही सुप्रिया सुळेंवर टीका; त्यांना संसदरत्न मिळाला, तुम्हाला?

बारामतीमध्ये निवडणुकीचा फिवर चांगलाच वाढला आहे. आरोपप्रत्यारोपांच्या फैरी झडत आहेत. पण हे आरोपप्रत्यारोप एकाच कुटुंबात होताना दिसत आहे. आधी उपमुख्यमंत्री अजित पवार यांनी संसदरत्न पुरस्कारावरून शरद पवार गटाच्या उमेदवार सुप्रिया सुळे यांच्यावर टीका केली होती. आता अजित पवार यांचे दुसरे चिरंजीव जय पवार यांनीच आपल्या आत्याच्या संसदरत्न पुरस्कारावरून सवाल केला आहे. त्यांना संसदरत्न पुरस्कार मिळाला, भोर तालुक्याला काय मिळालं? असा सवालच जय पवार यांनी केला आहे. जय पवार यांनी पहिल्यांदाच सुप्रिया सुळे यांच्यावर टीका केली आहे.

जय पवार यांनी भोर तालुक्यात एका रॅलीला संबोधित करताना हा सवाल केला आहे. अनेक वर्ष तुम्ही सुप्रियाताईंना संधी दिली होती. त्यांना खासदार बनवलेलं होतं, पण जशी कामे व्हायला पाहिजे होती तशी काहीच काम दिसली नाहीत, अशी टीकाच जय पवार यांनी सुप्रिया सुळे यांचं नाव न घेता केली.

तो मोठा पुरस्कार नाही

आज त्या बोलतायत मला संसदरत्न पुरस्कार मिळालाय, त्यांना पुरस्कार मिळालाय. पण तुमच्या भोर तालुक्याला काय मिळाल? संसदरत्न पुरस्कार हा सरकारचा नाहीये, हा एका एनजीओ मार्फत दिला जातो. त्यामुळे तो असं काही मोठा पुरस्कार नाही, असा हल्लाच जय यांनी चढवला आहे.

खोटं बोलून त्यांना काय मिळतंय

मीडियाचा गैरवापर कसा करायचा हे त्यांना चांगलं माहित आहे. काल बारामतीमध्ये जैन समाजाच्या कार्यक्रमादरम्यान सुप्रियाताई आणि मी एकत्र आलो. तेव्हा मी त्यांना बोललो, आत्या तुम्ही पहिला नारळ ठेवा. तर त्या म्हणाल्या, नाही… जय तू आधी ठेव. मग मी नारळ ठेवून डोळे मिटून प्रार्थना करत होतो. त्याच वेळेस माझ्या शेजारी बारामतीचे शहराचे अध्यक्ष जय पाटील येऊन उभे राहिले.

मी प्रार्थना करत असताना सुप्रियाताई म्हणाल्या, काय जय कसं चाललंय, मला वाटलं त्या मला म्हणाल्या. म्हणून मी डोळे उघडून त्यांना बोललो आता सगळं बर आहे. मग त्या मला म्हणाल्या, मी तुला नाही. मी दुसऱ्या जयशी बोलत होते. पण नंतर त्यांनी ते सर्व व्हिडिओ पत्रकारांना दिलेआणि त्यांना खोटी बातमी करायला लावली. सुप्रिया सुळे यांनी जय पवारची विचारपूस केली, अशी बातमी त्यांनी करायला सांगितली. हे खोटं बोलून त्यांना काय मिळतंय?, असा सवाल त्यांनी केला.