महिला बचत गटांची उत्पादने डबेवाले घरोघरी पोहोचवणार; ऑनलाइन सुविधेसाठी ‘एसएनडीटी’चे ऍप

मुंबईतील महिला बचत गटांची उत्पादने आता डबेवाले थेट घरोघरी पोहोचवणार आहेत. यासाठी एसएनडीटीच्या माध्यमातून एक अद्ययावत ऍप तयार केले जाणार आहे. या ऍपवरून तुम्ही आपल्याला हवे असणारी वस्तू, पदार्थाची नोंदणी ऑनलाइन करू शकणार आहात. महिला बचत गटांच्या उत्पादनांना बाजारपेठ मिळावी यासाठी हा उपक्रम राबवल्याचे पालिकेचे अतिरिक्त आयुक्त डॉ. सुधाकर शिंदे यांनी सांगितले.

या उपक्रमासाठी सुरू केलेल्या ऍपमध्ये समाविष्ट असणाऱ्या उत्पादनांसाठी एक विशिष्ट गुणवत्ता परीक्षण, दळणवळण व्यवस्था आदी सगळय़ा निकषांची पूर्तता करणाऱ्या  उत्पादनांचा समावेश असावा, अशा सूचना डॉ. शिंदे यांनी दिल्या आहेत. डॉ. सुधाकर शिंदे यांची मुंबई डबेवाला संघटनेच्या शिष्टमंडळाने आज भेट घेतली. यावेळी वातावरण संस्थेचे प्रतिनिधीही उपस्थित होते.

ऍपमध्ये काय आहे…

या ऍपमध्ये उत्पादने तयार करतानाची महिलांची छायाचित्रे आणि व्हिडीओ याचा समावेश असेल. तसेच अत्यंत प्रभावीपणे ही उत्पादने घरोघरी पोहचतील यासाठी ऍपमध्ये विशिष्ट वैशिष्टय़े समाविष्ट करण्यात येतील. तसेच उत्पादनाचे चांगले ब्रँडिंगही उपलब्ध करून देण्यात येणार आहे. बचत गट उत्पादनांना घरोघरी पोहचवण्यासाठी डबेवाल्यांची यंत्रणा वापरण्यात येणार आहे.

लाखो महिलांना फायदा

मुंबईतील सुमारे दहा हजार महिला बचत गटांसोबत एक लाखांहून अधिक महिला विविध वस्तू आणि उत्पादने तयार करत आहेत.

त्यामध्ये खाद्यपदार्थांपासून ते महिलांनी स्वतः तयार केलेल्या वस्तूंचा समावेश आहे. या उत्पादनांना चांगली बाजारपेठ मिळावी म्हणून पालिकेचा नियोजन विभाग ऍप विकसित करण्याची कार्यवाही करीत आहे.

ऍप विकसित करण्यासाठी पालिकेने एसएनडीटी विद्यापीठासोबत सामंजस्य करारही केला आहे. या विद्यापीठाच्या इनक्युबेशन सेंटरच्या माध्यमातून ऑप्लिकेशन विकसित करण्यात येणार असल्याची माहिती पालिकेच्या संचालक (नियोजन) डॉ. प्राची जांभेकर यांनी दिली.