31 मेपूर्वी मॅनहोल जाळय़ांनी सुरक्षित करा! पालिका आयुक्तांचे  सर्व 25 वॉर्डना निर्देश

पावसाळय़ापूर्वी सर्व मॅनहोल संरक्षक जाळ्यांनी सुरक्षित करा, असे सक्त निर्देश पालिका आयुक्त- प्रशासक भूषण गगराणी यांनी सर्व 25 वॉर्डना दिले आहेत. याबाबत तातडीने कार्यवाही करावी आणि 31 मेपर्यंत हे काम पूर्ण करावे, असेही आयुक्तांनी म्हटले आहे.

मुंबईत पर्जन्य मलनिस्सारण प्रचालन खाते व पर्जन्य जलवाहिनी विभागाचे मिळून सुमारे एक लाखांवर मॅनहोल आहेत. यातील हजारो मॅनहोलवर अजूनही सुरक्षा जाळी नसल्याने या ठिकाणी अपघात होण्याची शक्यता असते. ऑगस्ट 2017 मध्ये परळ येथे उघडय़ा मॅनहोलमध्ये पडून मुंबई रुग्णालयाचे डॉ. दीपक अमरापूरकर यांचा मृत्यू झाल्याची दुर्दैवी घटना घडली होती. यानंतर उघडय़ा मॅनहोलचा प्रश्न ऐरणीवर आला होता. तर काही वेळा समाजकंटकांकडून मॅनहोलचे झाकण चोरण्याचे प्रकार घडत असल्याचे समोर आले आहे. त्यामुळे दुर्घटना घडण्याची भीती निर्माण होते. त्यामुळे उघडय़ा मॅनहोल सुरक्षा जाळीने बंदिस्त करा, असे निर्देश मुंबई उच्च न्यायालयाने मुंबई महापालिकेला दिले आहेत. तर पाणी तुंबणाऱया ठिकाणचे सर्व मॅनहोल सुरक्षित जाळीने बंदिस्त केले असल्याची माहिती पालिका प्रशासनाकडून देण्यात आली. तर सर्वच एक लाखांवर असणारे मॅनहोल जाळीने सुरक्षित करण्यासाठी कृती आराखडा तयार करून पालिकेकडून कार्यवाही करण्यात येत आहे.

अशी आहे मॅनहोलची स्थिती

एकूण मॅनहोल                  1 लाख 286

मलनिŠसारण विभाग       74 हजार 693

पर्जन्य जलवाहिन्या विभाग 25 हजार 593

संरक्षक जाळय़ा बसवल्या

मलनिŠसारण विभाग       1 हजार 982

पर्जन्य जलवाहिन्या विभाग 3 हजार 692

एकूण                            5 हजार 674