ऐन निवडणुकीत वर्ध्यातील भाजप खासदार अडचणी; तरामदास तडस यांच्या सुनेचे घरगुती हिंसाचाराचे आरोप

वर्ध्यातील भाजप खासदार रामदास तडस यांच्या प्रचारसभेसाठी पंतप्रधान नरेंद्र मोदी येणार अशी हवा असतानाच आता त्यांची सून पूजा यांनी रामदास तडस आणि मुलगा पंकज यांच्यावर केलेल्या घरगुती हिंसाचाराच्या गंभीर आरोपामुळे तडस पिता-पुत्रांच्या अडचणीत वाढ झाली आहे. शिवसेना उपनेत्या सुषमा अंधारे यांच्यासह आज पत्रकार परिषदेत त्यांनी घरगुती हिंसाचाराला वाचा फोडली.

पूजा तडस यांनी पत्रकार परिषेदत पिता-पुत्रांकडून सुरू असलेल्या छळवणुकीची माहिती देत पंतप्रधान नरेंद्र मोदी यांनीच आपल्याला न्याय मिळवून द्यावा, अशी विनंतीही केली. पूजा म्हणाल्या, ‘मी लग्न करून सासरी गेली तेव्हा मला अपमानास्पद वागणूक देण्यात आली, माझ्यावर घाणेरडे आरोप करण्यात आले. एकदा तर मला लोखंडी रॉडनेही मारहाण करण्यात आली.’

दरम्यान, पूजा तडस यांच्या आरोपांचे रामदास तडस यांनी खंडन केले आहे. ते म्हणाले. ‘निवडणुका आल्या की माझ्यावर असे गंभीर आरोप केले जातात. माझ्या या प्रकरणाशी कोणताही संबंध नाही. माझ्या मुलगा आणि पूजा यांनी लग्न केले तेव्हा आम्हाला याची माहिती नव्हती. पूजा या आमच्याबरोबर राहत नाही. लग्नानंतर काही दिवसांनी त्यांच्यात वाद झाले. ते प्रकरण न्यायालयात प्रलंबित आहे. त्यामुळे माझे या प्रकरणाशी काहीही घेणेदेणे नाही,’ असे ते म्हणाले.

…तर समाजाला काय न्याय देणार?

माझ्या बाळाला घेऊन मी अनेक ठिकाणी फिरते आहे. ज्या फ्लॅटवर आम्ही राहत होतो तो फ्लॅट विकून मला बेघर करण्यात आले. इतक्या खालच्या पातळीवर जाऊन मला त्रास दिला जात आहे. रामदास तडस एक लोकप्रतिनिधी जर त्यांच्या सुनेला न्याय देऊ शकत नसतील तर ते समाजाला काय न्याय देतील, असा प्रश्नही पूजा यांनी केला आहे.

तडस यांच्या सुनेने काय आरोप केले आहेत…

– स्वतःच्या मुलाला बलात्काराच्या आरोपातून वाचवण्यासाठी आमचे लग्न लावून देण्यात आले.

– लग्नानंतर मला एका फ्लॅटवर नेऊन ठेवण्यात आले. तिथे वाईट पद्धतीने माझ्याशी वागण्यात आले. तिथे मला केवळ उपभोगाची वस्तू म्हणून ठेवण्यात आले. त्यातूनच माझ्या बाळाचा जन्म झाला.

– बाळाच्या जन्मानंतर हे बाळ कोणाचे आहे त्याची डीएनए चाचणी कर, असा दबाव माझ्यावर टाकण्यात आला.