महाकाल मंदिरात भस्म आरतीच्यावेळी आगीत होरपळलेल्या सेवकाचा मुंबईत मृत्यू

मध्य प्रदेशातील उज्जैनच्या प्रसिद्ध महाकाल मंदिरात भस्म आरती वेळी आगीत पुजाऱ्यासह 14 भाविक होरपळल्याची घटना घडली होती. आगीत भाजलेल्या सत्यनारायण सोनी नावाच्या 79 वर्षीय सेवकाचा मुंबईतील रुग्णालयात बुधवारी सकाळी उपचारादरम्यान मृत्यू झाला.

25 मार्च रोजी लागलेल्या आगीत 14 जखमींपैकी एकाचा आज सकाळी मृत्यू झाला आहे. उज्जैन जिल्हा रूग्णालयाआधी त्यांना इंदूर येथील अरबिंदो रूग्णालयात भरती केले होते. तिथून त्यांच्यावर चांगल्या उपचारासाठी मुंबईत आणले होते. महाकाल मंदिरात 25 मार्च रोजी सकाळी 5.49 वाजता भस्म आरती सुरू होती. भाविक गुलाल उधळत होते. भस्म आरती करणारे पुजारी संजीव यांच्यावरही गुलाल उधळला. गुलालामधील रसायनामुळे आगीचा भडका उडाला असा अंदाज व्यक्त केला होता. आगीमुळे काही काळ भाविकांमध्ये घबराहट पसरली होती. पुजारी संजीव यांच्यासह 14 भाविक जखमी झाले होते. जखमींमध्ये 9 जणांना इंदूर येथील रूग्णालयात नेण्यास सांगितले होते. याप्रकरणी मुख्यमंत्री मोहन यादव यांनी तपासाचे आदेश दिले होते. आरतीच्या वेळी गुलाल उधळल्यामुळे ही घटना घडल्याचे सांगण्यात आले होते.

ही दुर्घटना 25 मार्च रोजी झाली. महाकाल मंदिरात हजारो भक्त उपस्थित होते. सर्व महाकाल मंदिरात होळी साजरी करत होते. तसेच मध्य प्रदेशचे मुख्यमंत्री मोहन यादव यांचा मुलगा वैभव यादव आणि मुलगी आकांशी या अपघातावेळी मंदिरात उपस्थित होते. मात्र, मुख्यमंत्र्यांचे कुटुंब तसेच गर्भगृहाबाहेर उपस्थित असलेले सर्व भाविक सुरक्षित राहिले. त्याचबरोबर परिस्थितीही वेळीच नियंत्रणात आली.