गुढीपाडव्याच्या मुहूर्तावर सोने खरेदीत घट; दरवाढीमुळे खरेदीकडे अनेकांनी फिरवली पाठ

साडेतीन मुहूर्तांपैकी एक असलेल्या गुढीपाडव्याच्या मुहूर्तावर सोने, चांदी, अंलकार किंवा नव्या गोष्टींची खरेदी करण्यात येते. यंदाही गुढीपाडव्याच्या मुहूर्तावर सोने खरेदीला ग्राहकांचा चांगला प्रतिसाद मिळेल, असा तज्ज्ञांचा अंदाज होता. तसेच गेल्या काही दिवसांपासून सोने- चांदीच्या दराने उसळी घेतली असून सराफा बाजारातही तेजी आहे. त्यामुळे गुढीपाडव्याला मोठ्या प्रमाणात सोने खरेदी होईल, असा अंदाज होता. मात्र, सोन्याच्या दराने 70 हजाराचा टप्पा गाठल्याने गुढीपाडव्याच्या मुहूर्तावर ग्राहकांनी सोने खरेदीरडे पाठ फिरवली.

काही महिन्यांपासून सोन्या-चांदीच्या दरात सातत्याने वाढ होत आहे. गेल्या महिन्यात सोन्याचा भाव 60 हजार प्रति 10 ग्रॅम होता. तर आठवड्याभरापूर्वी सोने 63 हजारांवर पोहचले होते. आता बाजारात सोन्याच्या दराने 70 हजाराचा टप्पा गाठला आहे. त्यामुळे ग्राहकांनी यंदा सोनेखरेदीकडे पाठ फिरवल्याचे सराफा बाजारातून सांगण्यात आले. सध्या लग्नसराईला सुरुवात झाल्याने सोने खरेदी वाढण्याची शक्यता आहे. मात्र, सोन्याचे दर वाढल्याने महिलांचा कल आता जायमंड वर्कचे दागिने घेण्याकडे असल्याचे व्यापाऱ्यांनी सांगितले. तसेच पूजेसाठी चांदीच्या नाण्यांनाही बाजारात मागणी आहे.

गुढीपाडव्याच्या दिवशी ग्राहकांनी पाठ फिरवली असली तरी बुधवारी सोने-चांदीच्या किंमतीत वाढ झाली. बुधवारी 24 कॅरेट शुद्ध सोन्याची किंमत 7174 रुपये प्रति ग्रॅम, तर 22 कॅरेट सोन्याची किंमत 6576 रुपये प्रति ग्रॅम आहे. आज तसेच चांदीच्या किमतीत 100 रुपयांनी वाढली असून चांदीचा दर 85,500 रुपये प्रतिकिलो आहे. तर मुंबईत सोन्याचा दर 71,740 रुपये प्रति 10 ग्रॅमवर पोहोचला आहे.