युसूफ, रझाक यांच्यावर नवी जबाबदारी

वृत्तसंस्था/ लाहोर

पाक क्रिकेट मंडळाचे (पीसीबी) विद्यमान निवड सदस्य मोहम्मद युसूफ आणि अब्दुल रझाक यांच्यावर  आता नवी जबाबदारी टाकण्यात आली आहे. चालू महिन्याच्या अखेरीस पाक आणि न्यूझीलंड यांच्यात पाकमध्ये होणाऱ्या टी-20 मालिकेसाठी युसूफ आणि रझाक हे पाक संघाचे अनुक्रमे हंगामी प्रमुख प्रशिक्षक आणि साहाय्यक प्रशिक्षक म्हणून राहतील.

गेल्या काही कालावधीपासून पाक क्रिकेट संघाला कायमस्वरूपी प्रशिक्षक लाभलेला नाही. भारतात झालेल्या विश्वचषक क्रिकेट स्पर्धेतील निकृष्ट कामगिरीनंतर पीसीबीने तत्कालीन विदेशी प्रशिक्षकांची हकालपट्टी केली होती. दरम्यान, पीसीबीने नव्या प्रशिक्षकाच्या शोधमोहिमेला प्रारंभ केला आहे. पण विदेशी प्रशिक्षक गॅरी कर्स्टन आणि जेसन गिलेस्पी यांच्याशी पीसीबीने संपर्क साधला. पण या दोन्ही विदेशी प्रशिक्षकांनी दीर्घकालीन कराराची अट घातल्याने पीसीबीने त्यांचा विचार सोडून दिला आहे. आता न्यूझीलंड विरुद्धच्या मालिकेसाठी पाक संघाला युसूफ आणि रझाक यांचे मार्गदर्शन लाभणार आहे. कर्स्टन यांच्यासमवेत पीसीबीची चर्चा अद्याप सुरू असल्याचे सांगण्यात येत आहे. 18 एप्रिलपासून पाक आणि न्यूझीलंड यांच्यातील पाच सामन्यांच्या टी-20 मालिकेला प्रारंभ होत आहे.