पुणे बाजार समितीत आंबा ग्राहकांची फसवणूक, हापूसच्या नावाखाली कर्नाटक आंब्याची विक्री

पुणे बाजार समितीच्या गुलटेकडी मार्केटयार्डमध्ये कोकणातील रत्नागिरी आणि देवगड हापूस आंब्यांच्या नावाखाली कर्नाटक येथून येणार्‍या आंब्यांची सर्रास विक्री सुरू आहे. ग्राहकांची फसवणूक करणार्‍या आडत्यांवर कायदेशीर कारवाई करण्याचे पणन संचालकांचे आदेश समितीने धाब्यावर बसविले आहेत. बाजार समिती प्रशासनच आडत्यांना पाठीशी घालत असून शेतकर्‍यांना वार्‍यावर सोडल्याचे चित्र आहे.

फळांचा राजा म्हणून देशासह परदेशात रत्नागिरी आणि देवगड हापूस आंब्याने नावलौकिक मिळविला आहे. नावलौकीकाबरोबर रत्नागिरी आणि देवगड हापूस आंब्याला जीआय (भौगोलिक उपदर्शन) हे गुणवत्तेचे मानांकन मिळाले आहे. मार्केटयार्डमध्ये आंब्यांचा हंगाम बहरला असून, कोकणातील हापूससह परराज्यांतील विविध जातींच्या आंब्यांची आवक वाढली आहे. मात्र, अनेक आडते ग्राहकांची फसवणूक करीत परराज्यांतील आंब्यांची रत्नागिरी, देवगड हापूस आंब्यांच्या नावाने विक्री करीत आहेत. या फसवणुकीस आळा बसण्यासाठी तत्कालीन पणन संचालकांनी परिपत्रक काढत अशा फसवणूक करणार्‍या आडत्यांवर कायदेशीर कारवाई करण्याचा आदेश राज्यातील सर्व बाजार समित्यांना देऊन सुमारे चार वर्षे होत आले. मात्र, मार्केटयार्डमध्ये राजरोसपणे कर्नाटक, केरळ, आंध्र प्रदेशातील आंब्यांची देवगड, रत्नागिरी हापूसच्या बॉक्समध्ये भरून विक्री केली जात आहे.

साटेलोट्यामुळे कर्मचार्‍यांकडून कारवाई नाही !

मार्केटयार्डात आंबा शेड, फळबाजारातील गाळ्यांसह जी 55 जागांवरदेखील परराज्यांतील आंब्याची देवगड, रत्नागिरी हापूस आंब्याच्या बॉक्समध्ये भरून विक्री केली जात आहे. मुळ कोकणातील आंब्याच्या नावाखाली कर्नाटक आंब्याच्या विक्रीमुळे बाजार समितीसह कोकणतील आंब्याच्या नावलौकीकास बाधा येत आहे. मात्र, फळबाजारातील कर्मचारी आणि आडते यांच्यात साटेलोट्यामुळे आडत्यांवर कारवाई थांबविल्याची बाजारात चर्चा आहे.

हापूसच्या नावाखाली इतर आंबा विक्री करून फसवणूक करणार्‍या आडत्यांवर पहिल्या टप्प्यात दंडात्मक आणि परवाना निलंबनाच्या कारवाई केली जाईल. पुढील काळात नियमानुसार कायदेशीर कारवाई कडक कारवाई केली जाणार आहे. – डॉ.राजाराम धोंडकर, सचिव, बाजार समिती, पुणे.