मुले चोरणार्‍या तस्कर टोळीचे सात जण अटकेत; सीबीआयची कारवाई, तीन बालके सापडली

केंद्रीय अन्वेषण विभागाने (सीबीआय) देशभरात लहान मुलांची तस्करी करणार्‍या टोळीचा पदार्फाश केला. तपास यंत्रणेने दिल्ली व हरयाणात 7 ठिकाणी छापेमारी करत दिल्लीतील केशवपुरम येथील घरातून तीन नवजात बालकांची सुटका केली. यादरम्यान छापेमारीत सात जणांना अटक केली असून, जवळपास  4 ते 5 लाख रुपयांना एक बालक विक्री करत असल्याचे समोर आले.

तीन नवजात बालकांमध्ये दोन मुले असून, त्यापैकी एक दीड दिवसांचा, तर दुसरा 15 दिवसांचा आहे. एक मुलगी साधारण एक महिन्यांची आहे. सीबीआयने हॉस्पिटलच्या वॉर्डबॉयसह ७ जणांना अटक केली आहे. यामध्ये अनेक महिलांचा समावेश आहे. सीबीआयच्या सूत्रांनी दिलेल्या माहितीनुसार, आरोपींना एनसीआर भागातून पकडण्यात आले आहे. हे लोक हॉस्पिटलमधून नवजात बालके चोरायचे. मग त्यांची काळ्याबाजारात मालासारखा सुमारे  4 ते 5 लाख रुपयांचा सौदा व्हायचा. मार्च महिन्यात सुमारे 10 मुलांची विक्री झाल्याचे समोर आले. शोध मोहिमेदरम्यान साडेपाच लाख रुपये रोख आणि अनेक कागदपत्रांसह आक्षेपार्ह वस्तू जप्त करण्यात आल्या. सीबीआय अनेक राज्यांमध्ये बालतस्करी प्रकरणाचा तपास करत आहे. देशातील अनेक मोठी रुग्णालये बालतस्करीच्या रॅकेटच्या कचाट्यात आली आहेत.