120 तास उपाशी होतो! नारायण मूर्ती यांनी सांगितली संघर्ष गाथा

हिंदुस्थानातील अव्वल श्रीमंतांपैकी एक असलेले आयटी क्षेत्रातील दिग्गज, इन्पहसिसचे संस्थापक एन. आर. नारायण मूर्ती यांच्यावर एकेकाळी युरोपमध्ये तब्बल 120 तास उपाशी राहण्याची वेळ आली होती. नारायण मूर्ती यांनी स्वतः आपल्या आयुष्यातील संघर्षाची माहिती एका कार्यक्रमात दिली.

न्यूयॉर्कमध्ये संयुक्त राष्ट्र संघ आणि हिंदुस्थानच्या स्थायी मिशनने विशेष कार्यक्रम नुकताच आयोजित केला होता. या वेळी ‘अन्न सुरक्षा आणि हिंदुस्थानचे शाश्वत विकासाचे ध्येय’ या विषयावर नारायण मूर्ती यांचे व्याख्यान झाले. त्यामध्ये नारायण मूर्ती म्हणाले, सुमारे 50 वर्षांपूर्वी मी युरोपमध्ये फिरत असताना मला सलग तब्बल 120 तास उपासमार सहन करावी लागली. तुमच्यापैकी हे अनेकांना माहीत नाही.

पाच दशकांपूर्वी मी युरोपमधील निश नावाच्या शहरात जात होतो. हे शहर बुल्गारिया आणि तत्कालीन युगोस्लाव्हिया व आजचे सर्बिया यांच्या सीमेवर वसलेले आहे.

हिंदुस्थानींना आणि मलाही हिंदुस्थान सरकारमुळे उत्तम दर्जाचे शिक्षण मिळाले. त्यामुळे आज सुसंस्कृत लोक म्हणून आपण आपल्या राष्ट्राप्रति कृतज्ञता व्यक्त केली पाहिजे. यासोबतच असहाय, गरीब मुलांना चांगले शिक्षण मिळण्यासाठी मदत केली पाहिजे.