दहा वर्षे खासदारकी भोगूनही जनता बारणेंना ओळखत नाही, संजोग वाघेरे यांचा पलटवार

मावळ लोकसभा मतदारसंघात रायगड जिल्ह्यातील तीन मतदारसंघांसह सहा मतदारसंघ येतात. लोकांपर्यंत पोहोचत असताना मी पिंपरी-चिंचवडचा महापौर असताना केलेली विकासकामे सांगत आहे. त्याची मला जराही लाज वाटत नाही, पण गेली 10 वर्षे खासदारकी भोगल्यानंतरही या मतदारसंघातील जनता तुम्हाला ओळखत नाही, असा पलटवार शिवसेना (उद्धव बाळासाहेब ठाकरे) पक्षाचे उमेदवार आणि मावळ लोकसभा संघटक संजोग वाघेरे यांनी मिंधे गटाचे उमेदवार श्रीरंग बारणे यांच्यावर केला आहे.

संजोग वाघेरे यांनी पहिल्या टप्प्यातच प्रचारात आघाडी घेतली आहे. ते मावळमधील तीन आणि रायगडातील उरण, पनवेल, कर्जत-खालापूरच्या गावागावात पोहोचत आहेत. वाघेरे यांना मी पिंपरी-चिंचवडचा महापौर होतो हे लोकांना सांगावे लागत असल्याची टीका मिंधे गटाचे उमेदवार श्रीरंग बारणे यांनी केली. त्याला वाघेरे यांनी चोख प्रत्युत्तर दिले.

मतदारांच्या प्रश्नांचे आधी उत्तर द्या!

मी 30 वर्षे राजकारणात आहे. पिंपरी-चिंचवडचा महापौरही होतो. या काळात मी केलेली विकासकामे जनतेला माहीत आहेत. मावळ मतदारसंघातील सहाही विधानसभा क्षेत्रांतील वाड्यावस्त्यांवर फिरताना खासदार आमच्याकडे फिरकलेले नाहीत असे मतदार सांगत आहेत. दहा वर्षे खासदारकी भोगून जनता तुम्हाला ओळखत नाही त्याचे उत्तर आधी द्या, असा टोलाही वाघेरे यांनी लगावला.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.