राहता येथील अंगणवाडी सेविकेच्या लेकीची भरारी, गरिबीवर मात करत झाली एमबीबीएस

कोणतंही स्वप्न पूर्ण करण्यासाठी इच्छाशक्ती आणि जिद्दीला प्रामाणिक कष्टाची जोड दिली, तर आकाशालाही गवसणी घालता येते. राहता तालुक्यातील कोऱ्हाळे येथील राजाराम कालेकर या साई संस्थानमधील कर्मचारी व आई अंगणवाडी सेविका सुरेखा या दाम्पत्याची मुलगी प्रियंका सुरेखा राजाराम कालेकर हिने आपल्या कर्तृत्वाने दिला आहे. आर्थिक परिस्थिती हलाखीची असतानाही खेडेगावात राहून, अवघड समजली जाणारी एमबीबीएस पदवी प्रियंका ने नुकतीच मिळवली आहे. यामुळे सर्व स्तरातून तिचं कौतुक केलं जात आहे.

मूळची राहता तालुक्यातील कोऱ्हाळे या गावातील प्रियंका राजाराम कालेकर खेड्यातच लहानाची मोठी झाली. तिचे वडील साई संस्थान कर्मचारी आहेत, तर आई अंगणवाडी सेविका आहे. यामुळे प्रियंकाच्या घरची परिस्थिती नाजूक आहे. नीट परीक्षेचा निकाल लागल्यानंतर या परीक्षेत तिला 585 गुण मिळाले. त्या आधारे तिला पुणे येथील बी. जे. मेडिकल कॉलेजमध्ये प्रवेश मिळाला. या कॉलेज मधील अनेक मुलं हे सधन घरातली होती. यामुळे या मुलांच्या मौजमजांच्या इच्छा सहज पूर्ण होत होत्या.मात्र प्रियंकाला शिक्षणाच्या साहित्यासाठीही घरी फोन करून पैसे मागवताना अनेक वेळा विचार करायला लागायचा, यामुळे अनेक वेळा इच्छा असतानाही तिला त्या पूर्ण करता आल्या नाहीत,असं ती सांगते.

कोऱ्हाळे येथील श्रीगणेश शैक्षणिक संकुलाचे अध्यक्ष प्रा. विजय शेटे यांनी सांगितले की, प्रियंकाने गावातीलच न्यू इंग्लिश स्कूलमध्ये दहावीच्या परीक्षेत 95 टक्के गुण मिळविले. श्री गणेश शिक्षण संस्थेत तिने विज्ञान शाखेत अकरावी व बारावीचे शिक्षण पूर्ण केले. बारावीच्या परीक्षेत देखील तिने 95 टक्के गुण मिळविले.फिजिक्समध्ये शंभरपैकी शंभर गुण मिळविले होते. डॉ. प्रियंका कालेकर हिने आई-वडिलांचे स्वप्न साकार केले, तसेच श्रीगणेश शैक्षणिक संस्थेचा नावलौकिक देखील वाढविला. तिचा भाऊ अनिकेत देखील इंजिनिअर झाला. या भावंडांना घडविण्यात त्यांच्या आई- वडिलांचा मोठा वाटा आहे.तिने एमबीबीएस परीक्षेत घवघवीत यश मिळवून आपल्या आई-वडिलांचे स्वप्न साकार केले.अशा शब्दात प्राध्यापक शेटे यांनी भावना व्यक्त केल्या.

प्रियंकाला लहानपणापासूनच अभ्यासाची गोडी होती. लहानपणापासून मार्गदर्शन नसताना तिने स्वतःच्या आयुष्याच्या स्वप्नांचा शोध घेतला. शैक्षणिक सहित्याशिवाय कुठलाच हट्ट केला नाही. आज एका संस्थान कर्मचारी व अंगणवाडी सेविकेची मुलगी एमबीबीएस झाल्याचा मला वडिल म्हणून प्रियंकाचा अभिमान वाटतो, अशा भावना तिचे वडील राजाराम कालेकर व आई सुरेखा कालेकर यांनी व्यक्त केल्या.