आयफोन, आयपॅड हॅक होऊ शकतं, केंद्र सरकारचा अॅपलच्या ग्राहकांना गंभीर इशारा

हॅक होणार नाही, अशी ख्याती असलेल्या अॅपलच्या फोन आणि मॅकबुकसाठी केंद्र सरकारने एक गंभीर इशारा दिला आहे. आयफोन, आयपॅड आणि मॅकबुक हे हॅक होऊ शकतं, असा इशारा सरकारने दिला आहे.

केंद्राच्या सिक्युरिटी अॅडवायजरी इंडियन कॉम्प्युटर इमर्जन्सी रिस्पॉन्स टीमने अॅपल आयफोन, आयपॅड, मॅकबुक आणि व्हिजन प्रो हेडसेट या अॅपल निर्मित उत्पादनं हॅक होऊ शकतात असं म्हटलं आहे. या टीमने दिलेल्या इशाऱ्यानुसार, अॅपलच्या उत्पादनांमध्ये एक मोठा दोष आढळला आहे. त्यामुळे डेटा लीक होण्याची शक्यता आहे. या दोषाला रिमोट कोड एक्झिक्युशन असं नाव देण्यात आलं आहे.

या दोषामुळे अॅपलच्या काही व्हर्जन्सना डेटा लीक होण्याचा धोका संभवत आहे. यात 17.4.1 पूर्वीचं Apple Safari व्हर्जन, 13.6.6 पूर्वीचं Apple macOS वेंचुरा व्हर्जन आणि 14.4.1 पूर्वीचं Apple macOS सोनोमा व्हर्जन यांचा समावेश आहे. यासोबत 1.1.1पूर्वीचं अॅपल व्हिजन ओएस, 17.4.1 पूर्वीचं अॅपल आयओएस आणि ओएस आयपॅड व्हर्जन देखील प्रभावित होऊ शकतात.

तसंच, iPhone XS, iPad Pro 12.9-इंच, iPad Pro 10.5-इंच, iPad Pro 11-इंच, iPad Air, iPad आणि iPad Mini यांनाही हा धोका संभवत आहे. त्यामुळे ताबडतोब त्यांनी Apple iOS, iPadOS, macOS आणि VisionOS यांचे नवीन व्हर्जन अपडेट करावेत, असा सल्ला देण्यात आला आहे. त्याखेरीज सार्वजनिक वायफाय नेटवर्कचा वापर करू नये. टू फॅक्टर ऑथेंटिकेशन सुरू करावेत, फक्त अॅपल अॅप्लिकेशन स्टोअरमधूनच अॅप्स आणि सॉफ्टवेअर डाऊनलोड करावेत, असा सल्ला देण्यात आला आहे.