ज्या शिवसैनिकांमुळे श्रीकांत शिंदे खासदार झाले तेच आता त्यांना पाडणार, वैशाली दरेकर यांनी व्यक्त केला विश्वास

शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी मुंबईत लोकसभेसाठी बुधवारी चार उमेदवारांच्या नावाची घोषणा केली आहे. यात कल्याण मतदारसंघातून वैशाली दरेकर यांना उमेदवारी देण्यात आली आहे. मुख्यमंत्री एकनाथ शिंदे यांचे पुत्र श्रीकांत शिंदे हे या मतदारसंघातून विद्यमान खासदार आहेत. ”ज्या शिवसैनिकांच्या मेहनतीमुळे, कामामुळे श्रीकांत शिंदे खासदार झाले आता तेच शिवसैनिक त्यांना पाडतील”, असा विश्वास वैशाली दरेकर यांनी व्यक्त केला आहे.

”उद्धव ठाकरेंनी माझ्या सारख्या सर्वसामान्य व्यक्तीवर विश्वास दाखवला. त्याबद्दल मी त्यांची ऋणी आहे. समोर कल्याण लोकसभा नेहमी शिवसेनेच्या पाठिशी उभी राहिलेली आहे. यावेळेसही राहणार. श्रीकांत शिंदे हे देखील कधीतरी सामान्य होतेच. आम्हीच त्यांना निवडून दिलं. आम्हीच त्यांच्यासाठी काम केलं. ज्या शिवसैनिकांमुळे श्रीकांत शिंदे खासदार झाले तेच आता त्यांना पाडणार”, असे वैशाली दरेकर म्हणाल्या.

मुख्यमंत्री एकनाथ शिंदे यांचे पुत्र श्रीकांत शिंदे यांची उमेदवारी अद्याप जाहीर झालेली नाही. ठाणे आणि कल्याणवरून महायुतीत प्रचंड मतभेद निर्माण झाले आहेत. ठाण्यावर भाजपने आपला दावा सांगितल्याने मिंधे गटाच्या तंबूत अस्वस्थता पसरली असून ठाण्याचा निर्णय होत नाही तोपर्यंत कल्याणची उमेदवारी जाहीर न करण्याचा निर्णय मिंधे गटाने घेतला आहे. त्यामुळे ठाणे आणि कल्याणच्या उमेदवाराचे नाव पहिल्या यादीत जाहीर न करण्याची नामुष्की मिंध्यांवर ओढवली आहे.

बुधवारी कल्याणमधून वैशाली दरेकर यांना उमेदवारी देण्याची घोषणा शिवसेना पक्षप्रमुख उद्धव ठाकरे यांनी केली. हातकणंगलेमध्ये सत्यजीत पाटील यांना उमेदवारी, पालघरमध्ये भारती कामडी तर जळगावमधून करन पाटील यांना उमेदवारी जाहीर करण्यात आली आहे.