सुशील कुमार मोदी यांना कॅन्सर; आपली वेदना शेअर करत लिहिले- ‘PM ना सगळं सांगितलंय’

बिहारचे भाजपचे ज्येष्ठ नेते आणि माजी उपमुख्यमंत्री सुशील कुमार मोदी यांना कर्करोगाचे निदान झाले आहे. त्यांनी सोशल मीडिया साईट ‘एक्स’वर याबाबत भावूक पोस्ट शेअर करत, यावेळी लोकसभा निवडणुकीत काही करू शकत नाही, अशी खंत व्यक्त केली आहे. त्यांची ही पोस्ट सध्या सोशल मीडियावर व्हायरल होत आहे.

सुशील कुमार मोदी यांनी ‘एक्स’वर शेअर केलेल्या पोस्टमध्ये लिहिले आहे की, ”गेल्या सहा महिन्यांपासून कर्करोगाशी झुंझ देत आहे. आता वाटले लोकांना सांगण्याची ही योग्य वेळ आहे. यावेळी लोकसभा निवडणुकीत मी काही करू शकत नाही. याबाबत पंतप्रधान नरेंद्र मोदी यांना सर्व कळवले आहे. बिहार आणि पक्षाचा मी कायम आभारी असेन.”

बिहारचे उपमुख्यमंत्री असण्यासोबतच ते राज्यसभेचे खासदारही राहिले आहेत. मात्र, यंदा पक्षाने त्यांना राज्यसभेवर पाठवले नाही. सुशील कुमार मोदी हे बिहारच्या अर्थमंत्री आणि माजी उपमुख्यमंत्री या व्यतिरिक्त राज्यसभा, विधानसभा, विधान परिषदेचे सदस्य राहिले आहेत. 5 वर्षे ते विधान परिषदेचे सदस्य होते.

पिछले 6 माह से कैंसर से संघर्ष कर रहा हूँ । अब लगा कि लोगों को बताने का समय आ गया है । लोक सभा चुनाव में कुछ कर नहीं पाऊँगा ।
PM को सब कुछ बता दिया है ।
देश, बिहार और पार्टी का सदा आभार और सदैव समर्पित |

— Sushil Kumar Modi (मोदी का परिवार ) (@SushilModi) April 3, 2024

सुशील कुमार मोदी यांचा जन्म जानेवारी 1952 मध्ये पाटणा येथे झाला. त्यांचे शालेय शिक्षण सेंट मायकल स्कूलमध्ये झाले. त्यांनी पाटणा येथील बीएन महाविद्यालयात बीएससीची डिग्री घेतली. त्यानंतर त्यांनी जय प्रकाश नारायण यांच्यापासून प्रभावित होत यांनी चालवलेल्या आंदोलनात सहभागी झाले. 1990 मध्ये त्यांनी राजकारणात पदार्पण करत पाटणा सेंट्रल विधानसभेतून निवडणूक लढवली होती. तो आता कुम्हार विधानसभा मतदारसंघ म्हणून ओळखला जातो. चारा घोटाळ्यात लालूप्रसाद यादव यांच्या विरोधात त्यांनी पाटणा उच्च न्यायालयात जनहित याचिका दाखल केली होती. 2004 मध्ये ते भागलपूर मतदारसंघाचे प्रतिनिधीत्व करत लोकसभेचे सदस्य झाले. यानंतर त्यांनी बिहारच्या राजकारणात महत्त्वाची भूमिका बजावली.