कोण आहे प्रियांका चोप्राची होणारी वहिनी? भाऊ सिद्धार्थचा रोका, आधी मोडलं होतं लग्न

बॉलिवूडची ‘देसी गर्ल’ अर्थात अभिनेत्री प्रियांका चोप्राच्या घरी लवकरच सनई-चौघडे वाजणार आहेत. कारण तिचा भाऊ सिद्धार्थ चोप्रा लग्नबंधनात अडकणार आहे. नुकतीच प्रियांका आणि तिचा पती निक जोनास हे पारंपरिक पोशाखात कुठेतरी एकत्र जाताना दिसले. यावेळी प्रियांकाची आई मधू चोप्रासुद्धा उपस्थित होती. हे सर्वजण सिद्धार्थच्या रोका समारंभासाठी गेले होते. त्याचेच फोटो आता सोशल मीडियावर समोर आले आहेत. गेल्या काही दिवसांपासून प्रियांका आणि निक भारतात आहेत. इतर काही ठरलेल्या कार्यक्रमांसोबतच भावाच्या रोकाला उपस्थित राहण्यासाठी ती भारतात आल्याचं समजतंय.

सिद्धार्थने त्याच्या इन्स्टाग्राम अकाऊंटवर होणाऱ्या पत्नीसोबतचे फोटो पोस्ट केले आहेत. गर्लफ्रेंड नीलम उपाध्यायसोबत सिद्धार्थचा रोका पार पडला आहे. आता नीलम ही प्रियांकाची वहिनी होणार आहे. सोशल मीडियावर या दोघांच्या रोकाचे फोटो व्हायरल होत आहेत. सिद्धार्थचा याआधी इशिता कुमारशी साखरपुडा झाला होता. 2019 मध्ये या दोघांनी साखरपुडा केला होता. त्यावेळी प्रियांकासुद्धा रोका समारंभाला उपस्थित होती. एप्रिल 2019 च्या शेवटच्या आठवड्यात ते लग्न करणार होते. मात्र लग्नापूर्वीच त्यांचा ब्रेकअप झाला. नंतर 2021 मध्ये इशिताने दुसऱ्याशी लग्न केलं.

 

View this post on Instagram

 

A post shared by Neelam Upadhyaya (@neelamupadhyaya)

कोण आहे प्रियांका चोप्राची होणारी वहिनी?

सिद्धार्थची होणारी पत्नी आणि प्रियांकाची होणारी वहिनी नीलम उपाध्याय ही दाक्षिणात्य चित्रपटसृष्टीतील प्रसिद्ध अभिनेत्री आहे. तिने 2012 मध्ये ‘मिस्टर 7’ या तेलुगू चित्रपटातून अभिनयक्षेत्रात पदार्पण केलं होतं. तिने तमिळ भाषेतील चित्रपटांमध्येही काम केलंय. गेल्या नऊ वर्षांपासून ती टॉलिवूडमध्ये काम करतेय. 2018 मध्ये तिचा ‘तमाशा’ हा तेलुगू चित्रपट प्रदर्शित झाला होता.

भावाच्या रोकानंतर प्रियांकाने सोशल मीडियावर त्यांच्यासाठी खास पोस्ट लिहिली आहे. ‘सिद्धार्थ आणि नीलम.. तुम्हा दोघांना खूप सारं प्रेम आणि आशीर्वाद. रोका झाल्याबद्दल दोघांनाही शुभेच्छा’, अशा शब्दांत तिने भावना व्यक्त केल्या आहेत. यासोबतच प्रियांकाने एक फोटोसुद्धा पोस्ट केला आहे. ज्यामध्ये तिचा पती निक जोनास, ती, भाऊ सिद्धार्थ आणि नीलम हे चौघं एकत्र आहेत.