धैर्यशील पाटील यांचा भाजपने केला पोपट, लोकसभेचे गाजर दाखवून पक्षात घेतले आणि तटकरेंच्या प्रचाराला जुंपले

रायगड लोकसभेची उमेदवारी तुम्हालाच देऊ, असे सांगून भाजपने शेकापचे पेणचे माजी आमदार धैर्यशील पाटील यांना फोडले. भाजपचे जिल्हाध्यक्ष झाल्यानंतर धैर्यशील पाटील यांनी जिल्ह्यात बैठकांचा धडाका लावत तटकरेंविरोधात रान उठवले. मात्र ऐनवेळी भाजपने पाटील यांचा पोपट करत त्यांना सुनील तटकरे यांच्या प्रचाराला जुंपले आहे. त्यामुळे गेल्या दोन महिन्यांपासून उघडपणे तटकरेंविरोधात बेडकी फुगवणाऱ्या धैर्यशील पाटील यांना तटकरेंसमोरच आता मान तुकवून प्रचार करावा लागत असल्याने भाजपवाल्यांची अवस्था ‘सहन होईना आणि सांगता येईना’ अशी झाली आहे. सत्ता आणि यंत्रणांना हाताशी धरून भाजपने संपूर्ण राज्यात फोडाफोडी सुरू केली आहे. पेणमध्येदेखील माजी आमदार धैर्यशील पाटील यांना खासदारकीचे गाजर दाखवून भाजपमध्ये घेतले. दक्षिण रायगडच्या जिल्हाध्यक्ष पदाची ‘सुभेदारी’ देऊन भाजपने त्यांना कामाला लागण्याचे आदेश दिले.

नेत्यांच्या उपस्थितीत फुंकले होते रणशिंग

‘सागर’ बंगल्यावरील आदेशानुसार धैर्यशील पाटील जिल्हाभरात बैठका घेऊन तटकरेंना उमेदवारी देणे कसे अयोग्य आहे.. भाजपची मते अधिक असल्याने आपला उमेदवार कसा विजयी होईल याची गणिते ते पक्षश्रेष्ठींसमोर मांडत होते. सार्वजनिक बांधकाममंत्री रवींद्र चव्हाण तसेच भाजपच्या अनेक बड्या नेत्यांच्या उपस्थितीत झालेल्या बैठकांमध्येच तटकरेंविरोधात रणशिंग फुंकण्यात आले. परंतु ऐनवेळी रायगडची जागा अजित पवार गटाला देऊन भाजपने धैर्यशील पाटील यांचा पोपट केला, अशीच चर्चा आहे.