तुमच्याकडे धनाचे भांडार असतील… ओमप्रकाश राजेनिंबाळकर यांनी शेअर केली भावनिक पोस्ट

शिवसेना (उद्धव बाळासाहेब ठाकरे) पक्षाचे धाराशिवचे उमेदवारी ओमप्रकाश राजेनिंबाळकर यांनी आज सोशल मीडियावर एक भावनिक पोस्ट शेअर केली आहे. ओमप्रकाश यांनी त्यांचे दिवंगत वडिल पवनराजे निंबाळकर यांच्या सोबतचा एक जुना फोटो शेअर केला आहे. त्या फोटोसोबत त्यांनी एक भावनिक पोस्ट शेअर केली आहे. ”इतरांकडे धनाचे भांडार, पॉवर, सत्ता असेल पण माझ्याकडे राजेसाहेबांची (वडिलांची) पुण्याई व मायबाप जनतेचे आशिर्वाद असे दुहेरी शक्तिस्थळ आहे, असे त्यांनी या पोस्टमधून म्हटले आहे.

”सध्या सगळीकडे निवडणुकीची धामधूम आहे यात उमेदवार वेगवेगळे आराखडे लाऊन मतांची गोळा बेरीज करत आहे. याच निवडणुकीच्या धामधुमीत मला राजे साहेबांचे जुने सहकारी आणि माझ्या बरोबर सावली सारखे असणाऱ्या संतोष खोचरे यांना माझा आणि राजेसाहेबांचा एक जुना पण हृदस्पर्शी फोटो सापडला. तुमच्याकडे धनाचे भांडार असतील, सत्ता ,पॉवर असेल पण माझ्याकडे राजेसाहेबांची पुण्याई आणि मायबाप जनतेचे आशिर्वाद असे दुहेरी “शक्तिस्थळ” आहे. आता या शक्तिस्थळांच्या बळावरच मी निवडणुकीला सामोरे जात आहे. राजेसाहेब तुम्हाला अभिमान वाटेल असेच काम करत आलो आणि करत राहील ही ग्वाही देतो”, अशी पोस्ट त्यांनी शेअर केली आहे.

शिवसेना (उद्धव बाळासाहेब ठाकरे) पक्षाचे पक्षप्रमुख उद्धव ठाकरे यांनी धाराशिव येथील सभेत ओमप्रकाश राजेनिंबाळकर यांची उमेदवारी जाहीर केली होती.