महुआ मोइत्रांवर आरोप करणाऱ्या निशिकांत दुबेंनी मेडिकल कॉलेज बळकावलं, पत्नी व अन्य 9 जणांवर गुन्हा दाखल

तृणमूल काँग्रेसच्या नेत्या महुआ मोइत्रा यांच्यावर कॅश फॉर क्वेरीचा संसदेत आरोप करुन चर्चेत आलेले भाजपचे खासदार निशिकांत दुबे आता स्वत: अडचणीत आले आहेत. निशिकांत दुबे यांनी कागदपत्रांचा दुरुपयोग करत लिलावाच्या माध्यमातून एक खासगी मेडीकल कॉलेज बळकावल्याचा आरोप केला आहे. तसेच त्यांच्यासह त्यांच्या पत्नी आणि अन्य 9 जणांवर फसवणुकीची गुन्हा दाखल करण्यात आला आहे.

भाजपचे गोड्डा येथील खासदार निशिकांत दुबे यांनी देवघरमधील परित्रण मेडीकल कॉलेज आणि रुग्णालयाला कट रचून हडपल्याचा आरोप शिव दत्त शर्मा नावाच्या व्यक्तीने केला आहे. मिळालेल्या प्राथमिक माहितीनुसार, शिवदत्त शर्मा यांनी वैद्यकीय महाविद्यालय आणि रुग्णालयासाठी 93 कोटी रुपयांचे कर्ज घेतले होते, मात्र मेडीकल काऊन्सिल इंडिया द्वारा संस्थेसाठी मंजुरी मिळाली नव्हती. त्यामुळे त्यांच्या कर्जाची रक्कम नॉन परफॉर्मिंग ॲसेट म्हणून घोषित करण्यात आली. त्यानंतर दुबे यांनी या संकटातून बाहेर पडण्यासाठी त्यांच्याकडून 20 लाख रुपये घेतले होते. मात्र त्यानंतरही लिलावाच्या माध्यमातून त्यांनी गेल्यावर्षी डिसेंबर महिन्यात कॉलेज बळकावले. लिलावाच्या वेळी बाबा बैद्यनाथ मेडिकल ट्रस्टने बोली लावली.

देवघर मध्ये मेडिकल कॉलेज बळकावल्याचा आरोप भाजपचे गोड्डा येथील खासदार निशिकांत दुबे आणि त्यांच्या पत्नी अनामिका गौतम सहित 9 लोकांवर 406, 409, 420, 467, 468, 471, 120बी, 34 च्या अंतर्गत गुन्हा दाखल करण्यात आला आहे. मात्र निशिकांत दुबे यांनी हे सर्व आरोप फेटाळत आरोप सिद्ध झाल्यास राजकारण सोडणार असल्याचे सांगितले आहे, देवघर येथील जसीडीह ठाण्याचे प्रभारी रवि ठाकूर यांनी सांगितले की, शिव दत्त शर्मा नावाच्या व्यक्तीने भाजपचे खासदार आणि त्यांच्या पत्नीसह 9 लोकांविरुद्ध पोलीस स्थानकात तक्रार दाखल केली आहे. या आधारावर पोलिसांनी प्राथमिक तक्रार दाखल केली आहे. या प्रकरणाचा तपास सुरु असल्याचे सांगितले.