‘+92…’ नंबरवरून व्हॉट्सअॅप कॉल येतोय… सावधान!

अनोळखी मोबाईल नंबरवरून येणारे कॉल्स मोठय़ा अडचणीत टाकू शकतात. मार्पेटिंग कंपन्यांकडून येणारे अशा प्रकारचे कॉल्स ही नित्याची डोकेदुखी. आता त्यात आणखी भर पडलीय ती आंतरराष्ट्रीय फोन कॉल्सची. गेल्या काही दिवसांत अनेकांना ‘+92…’ नंबरवरून व्हॉट्सअॅप कॉल आला आणि आपण केंद्र सरकारच्या दूरसंचार मंत्रालयातून बोलत असल्याचे सांगण्यात आले, मात्र हे कॉल्स आम्ही केलेले नाहीत. हे कॉल्स उचलू नका, असा सावधानतेचा इशारा दूरसंचार मंत्रालयाने दिला आहे.

सरकारी विभागाकडून आलेल्या कॉलवर लोक विश्वास ठेवतात व गोपनीय माहितीही शेअर करतात. याच कल्पनेने सायबर गुन्हेगारांनी फसवणुकीची नवीन ‘मोड्स ऑपरेंडी’ अवलंबली आहे. अमुक अमुक तपशील द्या, अन्यथा तुमचा मोबाईल क्रमांक कायमचा बंद होईल अशा प्रकारची धमकी दिली जात आहे.

लोक भीतीपोटी लगेच माहिती देताहेत. प्रत्यक्षात हे कॉल्स पाकिस्तानसारख्या अन्य देशांतून येत आहेत. त्यामुळे कॉल्स उचलून गुप्त माहिती शेअर करण्याची जोखीम पत्करू नका, अशी सूचना दूरसंचार मंत्रालयाने केली आहे.

दूरसंचार मंत्रालयाचा अलर्ट

अज्ञात व्यक्ती दूरसंचार मंत्रालयाचे नाव सांगेल आणि तुम्ही बेकायदेशीर कृत्य केल्याचे सांगून मोबाईल क्रमांक बंद करण्याची धमकी देईल. कॉल करणाऱया व्यक्तीचा दूरसंचार मंत्रालयाशी काहीही संबंध नाही. आम्ही कोणत्याही व्यक्तीला असा कॉल करीत नाही किंवा व्हॉट्सअॅपवर मेसेज पाठवत नाही.

कॉल करणारा व्यक्ती वैयक्तिक माहिती मागवून फसवणूक करीत आहे. तुमचीही फसवणूक झाली असेल, तर 1930 क्रमांकावर कॉल करून किंवा  www.cybercryme.gov.in तक्रार नोंदवा.

ही खबरदारी घ्या!

तुमची वैयक्तिक माहिती, एटीएमचा पिन तसेच बँक खात्याशी संलग्न असलेला मोबाईल नंबर कुठेही शेअर करू नका.

काही महिन्यांनी एटीएम, जी मेल, फेसबुक, इन्स्टाग्रामचे पासवर्ड बदलत राहा.

आपल्याला पैसे पाठवत असल्याचे सांगून कुणी तुमच्या बँक खात्याचा नंबर वा एटीएम पिन वा ओटीपी मागू शकतो. ही माहिती देणे टाळा.