निवडणुकीचे पडघम वाजले, एलपीजीचे दर कमी झाले; गॅस सिलिंडर तब्बल 30.50 रुपयांनी स्वस्त

लोकसभा निवडणुकीची रणधुमाळी सुरू असून पहिल्या टप्प्यात देशातील 21 राज्ये आणि केंद्रशासित प्रदेशातील 102 मतदारसंघात 19 एप्रिल रोजी मतदान होणार आहे. तत्पूर्वीच एलपीजीच्या किंमतींमध्ये कपात करण्यात आली आहे. आजपासून सुरू झालेल्या नवीन आर्थिक वर्षाच्या पहिल्याच दिवशी 19 किलो वजनाचा व्यावसायिक गॅस सिलिंडर तब्बल 30.50 रुपयांनी स्वस्त झाला आहे.

तेल विपणन कंपन्या प्रत्येक महिन्याच्या पहिल्या तारखेला एलपीजी गॅस सिलिंडरच्या नवीन किंमती जाहीर करतात. त्यानुसार आज 1 एप्रिल रोजी तेल विपणन कंपन्यांनी 19 किलो वजनाच्या व्यावसायिक गॅस सिलिंडरच्या आणि फ्री ट्रेड एलपीजीच्या (एफटीएल) दरांमध्ये कपात करण्याचा निर्णय घेतला. व्यावसायिक गॅस सिलिंडर 30.50 रुपये ते 32 रुपये, तर एफटीएल सिलिंडर 7.50 रुपये स्वस्त झाला आहे.

Oil companies reduce price of 19 kg commercial and 5 kg FTL cylinders

Read @ANI Story https://t.co/SJ4Q0RXYfP#Oil #LPG #FTL pic.twitter.com/H1lCRVXmvt

— ANI Digital (@ani_digital) April 1, 2024

प्रमुख शहरांतील किंमती

नवीन दरांनुसार, मुंबईमध्ये व्यावसायिक गॅस सिलिंडरची किंमत 31.50 रुपयांनी कमी झाली आहे. त्यामुळे मुंबईमध्ये आता व्यावसायिक गॅस सिलिंडर 1717.50 रुपयांनी उपलब्ध असेल. तर राजधानी दिल्लीमध्ये व्यावसायिक गॅस सिलिंडरची किंमत 30.50 रुपये कमी होऊन 1764.50 रुपये, कोलकातामध्ये 32 रुपये कमी होऊन 1879 रुपये, चेन्नईमध्ये 30.50 रुपये कमी होऊन 1930 रुपये झाली आहे.

दोन महिने वाढ, निवडणुकीआधी दिलासा

दरम्यान, 19 किलो वजनाच्या व्यावसायिक गॅस सिलिंडरच्या किंमतींमध्ये गेल्या दोन महिन्यात (फेब्रुवारी आणि मार्च) वाढ करण्यात आली होती. आज किंमतींमध्ये कपात करण्यासाठी हाच गॅस सिलिंडर मुंबईत 1749 रुपये, दिल्लीत 1795 रुपये, कोलकातामध्ये 1911 आणि चेन्नईमध्ये 1960.50 रुपयांना मिळत होता.

घरगुती गॅस सिलिंडरचे दर ‘जैसे थे’

14 किलो वजनाच्या घरगुती गॅस सिलिंडरच्या दरांमध्ये कोणताही बदल करण्यात आलेला नाही. मुंबईमध्ये याची किंमत 802.50 रुपये, दिल्लरीमध्ये 803 रुपये, कोलकातामध्ये 829 रुपये आणि चेन्नईमध्ये 818.50 रुपये आहे.